ლაგოდეხის საარჩევნო ოლქში, კაბალის მე–18 უბანზე საარჩევნო ყუთში არასრულად შევსებული საკონტროლო ფურცელი ჩააგდეს. როგორც კახეთის საინფორმაციო ცენტრის კორესპონდენტს საუბნო კომისიის რამდენიმე წევრმა განუცხადა, საკონტროლო ფურცელში ამომრჩევლის პირადი მონაცემები სრულად არ არის შეტანილი.
ლაგოდეხის საოლქო საარჩევნო კომისიის თავმჯდომარის მარიკა გიორგაძის განცხადებით, კენჭისყრის დასრულების შემდეგ გაარკვევენ, საკონტროლო ფურცელი სათანადოდ არის თუ არა შევსებული.
ამავე უბანზე, თითქმის 2 საათის განმავლობაში არ უშვებდნენ „ნაციონალური მოძრაობის“ წარმომადგენელს. ის კენჭისყრის შენობაში მას შემდეგ შეუშვეს, რაც საარჩევნო უბანთან „ნაციონალური მოძრაობის“ მაჟორიტარობის კანდიდატი გურამ კაკალაშვილი მივიდა.
ოპოზიციური პარტიებიდან მაჟორიტარობის კანდიდატების ინფორმაციით, სოფელ კაბალში ერთი და იგივე ამომრჩევლები ხმას რამდენჯერმე, სხვადასხვა უბანზე აძლევენ. ამ დროისთვის ამ ინფორმაციის დამადასტურებელი მასალა კახეთის საინფორმაციო ცენტრმა ვერ მოიპოვა.
