საქართველოს ყოფილმა პრეზიდენტმა, ოდესის გუბერნატორმა მიხეილ სააკაშვილმა არჩევნებთან დაკავშირებით სახელმწიფო აპარატის წარმომადგენლებს, შეიარაღებულ ძალებსა და პოლიციას მიმართა. მისი თქმით, დღევანდელ მთავრობას და ხვალინდელ პოლიტიკურ ოპოზიციას არ უნდა ეშინოდეს.
„მე მინდა ვუთხრა დღევანდელ მთავრობას და ხვალინდელ პოლიტიკურ ოპოზიციას, თქვენც ნურაფრის ნუ შეგეშინდებათ. ჩვენი ამოცანა არ არის წარსულში გახედვა. ჩვენი ამოცანა არ არის ვიღაცის დევნა. ჩვენი პასუხი თქვენზე იქნება სწრაფი განვითარება და სწრაფი აღმშენებლობა. ჩვენ გვაქვს დიდი გეგმები და ჩვენ მთელ ძალას და ენერგიას მოვახმართ ამ გეგმების განხორციელებას“, - განაცხადა მიხეილ სააკაშვილმა.
მან ასევე მიმართა სახელმწიფო აპარატის წარმომადგენელებს. ,,უნდა იცოდეს სახელმწიფო აპარატის თითოეულმა წარმომადგენელმა, რომ მათ არაფერი ემუქრება. მე ძალიან ვამაყობ ჩვენი სახელმწიფო ინსტიტუტებით და თუ საქართველომ კიდევ გაძლო, ეს არის თქვენი დამსახურება, მეგობრებო. მე მინდა მივმართო ჩვენ შეიარაღებული ძალების წარმომადგენლებს და პოლიციელებს - მე ძალიან ვამაყობ თითოეული თქვენგანით და თქვენ უნდა გააგრძელოთ ქართული სახელმწიფოს სამსახური, ქართველი ხალხის გვერდში დგომა“, - განაცხადა მიხეილ სააკაშვილმა.
