"დღეს საქართველო არჩევნებამდე ორი დღით ადრე მსოფლიომ გაიცნო, როგორც ქვეყანა, სადაც დეპუტატის მანქანას არჩევნებამდე 2 დღით ადრე აფეთქებენ, ეს დამაზარალებელია ქვეყნისთვის," - ამ სიტყვებით დაიწყო საუბარი კურიერის პირდაპირ ეთერში დავით უსუფაშვილმა.
პარლამენტის თავმჯდომარე ამბობს, რომ ქვეყანაში შექმნილ მდგომარეობაზე პასუხისმგებლობა, ერთი მხრივ, ქართულ ოცნებას და ბიძინა ივანიშვილს, მეორე მხრივ კი ნაციონალურ მოძრაობას და მიხეილ სააკაშვილს ეკისრებათ.
უსუფაშვილი ფიქრობს, რომ ორივე პარტია და მათი ლიდერები ქვეყანას "უფსკრულისკენ მიაქანებენ".
"ჩემი მიმართვაა მოქალაქეებისადმი, ხალხო, მოდი, ბოროტმოქმედებს, რომლებიც მზად არიან
აფეთქებებისთვის, გამოვაცალოთ სამიზნე - ამომრჩევლები. უარი ვუთხრათ მოძალადეებს, მატყუარებს," - აღნიშნა საუბრის დროს დავით უსუფაშვილმა.
დავით უსუფაშვილმა გამოძიების შესახებაც ისაუბრა და აღნიშნა, რომ ასეთი ტიპის საქმეების გამოძიება 2 დღეში ვერ სრულდება, უსუფაშვილი ფიქრობს, რომ ეს იყო გათვლა.
"ისიც კარგად ვიცი, რომ 2 დღეში ასეთი ამბები არ იხსნება და, თუ ხვალ გაიხსნება, ეს ცალკე უბედურება იქნება. ამ ხალხს უნდათ პარლამენტში და იბრძვიან ამისთვის და იქ აღარ მუშაობენ," - ამბობს უსუფაშვილი.
