იმ ფონზე, როდესაც პარტიის ხელმძღვანელები აცხადებენ, რომ ფინანსური პრობლემებია და აქტვისტებს თანხებს ვერ უხდიან, პაატა ბურჭულაძეს ხელფასის სახით, 2015 წლის დეკემბრიდან 2016 წლის მაისის ჩათვლით, აღებული აქვს ჯამში 555 000 ლარი, - ამის შესახებ „პაატა ბურჭულაძე - მოძრაობა ხალხისთვის“ მცხეთა-მთიანეთის ყოფილმა ხელმძღვანელმა გიორგი ლაპენაშვილმა ბრიფინგზე განაცხადა.
„ჩემი დღევანდელი აღშფოთება გამოიწივია იმ ინფორმაციამ, რაც მივიღე ამ დღეებში. საზოგადოებისთავის ცნობილია, რომ პარტიამ დატოვა სათაო ოფისი იმ მოტივით, რომ ვერ იხდიან ქირას და პარტიას არ გააჩნია ფინანსები, ასევე რეგიონებში პარტიის აგიტატორებს, აქტივისტებს, ვერ უხდიან თუ არ უხდიან ხელფასებს. პარტიის ხელმძღვანელობა საკმაოდ სოლიდურ ხელფასებს იღებს, ჩემთვის ცნობილი გახდა ინფორმაცია ციფრების შესახებ, პაატა ბურჭულაძეს 2015 წლის დეკემბრიდან 2016 წლის მაისის ჩათვლით აღებული აქვს ჯამში 555 000 ლარი, როგორც ხელფასი. ამ თანხიდან მხოლოდ აპრილის თვეში მიღებული აქვს პატივცემულ პერსონას 187 000 ლარი, ეს იმ ფონზე, როცა ხდება მისი აპელირება და აფიშირება, რომ ჩვენ ფული არ გვაქვს, რომ პარტია განიცდის ფინანსურ კრიზისს. აქტივისტები მთელი საქართველოს მასშტაბით ფინანსური დახმარების გარეშე მუშაობენ. აქ არის საუბარი ძალიან მიზერულ თანხებზე, 150- 300 ლარზე, ეს ადამიანები მუშაობენ თვეების განმავლობაში უხელფასოდ, ჩვენი აღშფოთება იმან გამოიწვია რომ ეს ყველაფერი არის ტყუილი”,- განაცხადა ლაპენაშვილმა.
მისივე თქმით, პაატა ბურჭულაძე დღემდე ტყუილში ამყოფებს საკუთარი პარტიის წევრებს, მაშინ როდესაც პარტია სერიოზულ ფინანსურ შემოსავალს იღებს.
