თუ ”ქართული ოცნების” და ”ნაციონალური მოძრაობის პროგრამებს შევადარებთ, მმართველ პარტიას უფრო მეტად აქვს გამახვილებული ყურადღება სოციალურ პრობლემებზე და პროექტებზე, მაგრამ აქაც არ ჩანს კონკრეტული დაფინანსების წყაროები, - ამის შესახებ ფრიდრიხ ებერტის ფონდის კავკასიის წარმომადგენლობის დირექტორმა იულია ბლეზიუსმა ჟურნალისტებს DFWatch და ”სამხრეთ -აღმოსავლეთ ევროპული თანამშრომლობის ინიციატივის” კვლევის ”პარტიების სოციალური პროგრამები და დაპირებები” პრეზენტაციამდე განუცხადა.
იულია ბლეზიუსის შეფასებით, ქართული პოლიტიკა, მიუხედავად გაუმჯობესებული მდგომარეობისა, ჯერ კიდევ პიროვნებებთან არის დაკავშირებული.
,,სამწუხაროა, მაგრამ ყველა პარტიის საარჩევნო პროგრამაში ნაკლებად არის ასახული სოციალური სფერო, სოციალური პრობლემები. სამწუხაროა, იმიტომ, რომ საქართველოს მოსახლეობას ძირითადად ეს თემები აწუხებს. ეს არის დასაქმების პრობლემა, დაბალი პენსიები, და ა.შ. იმ პარტიებსაც კი, რომელთაც აქვთ ამაზე საუბარი, ნაკლებად აქვთ შემდეგ კონკრეტულად დასაბუთებული, თუ საიდან მოდის დაფინანსება.
თუ ორი წამყვანი პარტიის (”ქართული ოცნება” და ”ნაციონალური მოძრაობა”). პროგრამებს შევადარებთ, მმართველ პარტიას უფრო მეტად აქვს გამახვილებული ყურადღება სოციალურ პრობლემებზე და პროექტებზე, მაგრამ აქაც არ ჩანს კონკრეტული დაფინანსების წყაროები”, -განაცხადა იულია ბლეზიუსმა.
პროექტი ფრიდრიხ ებერტის ფონდის მხარდაჭერით განხორციელდა.
