2016 წლის პირველ ნახევარში მთლიანმა შიდა პროდუქტმა 15.4 მლრდ ლარი შეადგინა, რაც 2015 წლის შესაბამის მაჩვენებელზე 2.8%-ით მეტია.
2016 წლის პირველ კვარტალში მშპ-ს რეალური ზრდის ტემპი 2.6% იყო, ხოლო მეორე კვარტალში შეინიშნა ეკონომიკის აქტივობის ზრდა და მშპ-ს რეალური ზრდის ტემპმა 3.0% შეადგინა.
საყურადღებოა ის ფაქტი, რომ 2015 წლიდან შეიმჩნევა მშპ-ს რეალური ზრდის ტემპის დასტაბილურება, მაშინ როცა 2013 - 2014 წლებში ზრდის ტემპი შედარებით დიდი ცვალებადობით ხასიათდებოდა.
საქართველოს სტატისტიკის ეროვნული სამსახურის წინასწარი შეფასებით 2016 წლის პირველი რვა თვის საშუალო რეალურმა ზრდამ 2,7 პროცენტი შეადგინა.
2016 წლის პირველ ნახევარში მთლიანი შიდა პროდუქტის სტრუქტურა 2015 წლის შესაბამისი პერიოდის სტრუქტურის მსგავსია. სამი უმსხვილესი დარგი, რომლებიცაა: მრეწველობა (16.3%), ვაჭრობა (15.3%) და ტრანსპორტი და კავშირგაბმულობა (11.9%) ქმნის ქვეყნის მთლიანი შიდა პროდუქტის დაახლოებით 44.0%-ს, რაც ქვეყნის საწარმოო პოტენციალის ნაკლებ დივერსიფიკაციაზე მიუთითებს.
ეკონომიკის 10 უმსხვილესი დარგიდან 8 სერვისის მიმწოდებელია, საიდანაც სახელმწიფო მმართველობაზე მოდის 11.7%, ხოლო განათლებაზე მხოლოდ 4.4%.
2016 წლის პირველ ნახევარში 2015 წლის შესაბამის პერიოდთან შედარებით, უმეტეს დარგებში დაფიქსირდა ეკონომიკური ზრდა, მხოლოდ ტრანსპორტსა და კავშირგაბმულობასა (-2.1%) და ვაჭრობაში (-0.6%) დაფიქსირდა შემცირება.
2016 წლის პირველ ნახევარში ყველაზე მაღალი ეკონომიკური ზრდა მშენებლობის დარგში დაფიქსირდა (18.2%), რომელმაც ყველაზე დიდი წვლილი შეიტანა (1.1 პროცენტული პუნქტი) 2016 წლის პირველი ნახევრის ეკონომიკურ ზრდაში (2.8%). აღნიშნულ პერიოდში ასევე მნიშვნელოვანი ზრდა დაფიქსირდა საფინანსო საქმინობაში (8.9%), ოპერაციებში უძრავი ქონებით (6.1%) და მრეწველობაში (4.0%). მათი ჯამური წვლილი 2016 წლის პირველი ნახევრის ეკონომიკურ ზრდაში 1.4%-ს შეადგენდა (შესაბამისად - 0.4, 0.3 და 0.7 პროცენტული პუნქტი).
2016 წლის პირველ ნახევარში აგრეთვე მნიშვნელოვნადაა გაზრდილი ბიზნეს სექტორში მშენებლობის დარგის ბრუნვა (39.5%, 664.3 მლნ.ლარი) და გამოშვებული პროდუქციის მოცულობა (44.5%, 768.9 მლნ.ლარი). გაზრდილია აგრეთვე დასაქმებულთა რაოდენობა (2.4%, 1 353 კაცი) და დასაქმებულთა საშუალო თვიური ანაზღაურება (13.0%, 159.7 მლნ. ლარი). აღნიშნულ პერიოდში გაზრდილია სახელმწიფო ბიუჯეტის ხარჯები ინფრასტრუქტურულ პროექტებზე (8.4%, 20.3 მლნ. ლარი) ასევე გაზრდილია მშენებლოს დარგში გაცემული სესხების მოცულობა (41.9%, 199 მლნ.ლარი), რამაც უფრო მეტად შეუწყო ხელი მშენებლოს დარგის გააქტიურებას.
2016 წლის პირველ ნახევარში, 2015 წლის შესაბამის პერიოდთან შედარებით, შემცირებულია ტრანსპორტისა და კავშირგაბმულობის დარგში შექმნილი პროდუქციის მოცულობა (-2.1%). უნდა აღინიშნოს, რომ ტრანსპორტისა და კავშირგაბმულობის დარგის რეალური ზრდის ტემპი საკმაო მერყეობით ხასიათდება.
2016 წლის პირველ ნახევარში შემცირებულია ტრანსპორტისა და კავშირგაბმულობის დარგის ბრუნვის მოცულობა (-1.8%, -48.7 მლნ. ლარი), თუმცა გაზრდილია დარგის გამოშვება (2.8%, 53.6 მლნ.ლარი). აგრეთვე გაზრდილია, დარგში დასაქმებულთა რაოდენობა (3.1%, 1 810 კაცი) და მათი საშუალოთვიური ანაზღაურება (2.2%, 25.8 ლარი), თუმცა შემცირებულია ტრანსპორტისა და კავშირგაბმულობის დარგში გაცემული სესხების მოცულობა (-6.3%, -21. 9 მლნ.ლარი).
