ნამდვილად ვაპირებ საქართველოში ჩასვლას და ნამდვილად ვაპირებ არჩევნების შედეგების დაცვას, - ამის შესახებ საქართველოს ყოფილმა პრეზიდენტმა მიხეილ სააკაშვილმა აშშ-ში, ქართულ დიასპორის წარმომადგენლებთან შეხვედრაზე განაცხადა.
როგორც მიხეილ სააკაშვილმა აღნიშნა, როგორც კი მთავრობა აღიარებს, რომ ერთ-ერთ რეგიონში არჩევნები წაგებული აქვს, ე.ი. ყველაფერი წაგებული აქვს.
„იძახიან, რომ კარგი, სამეგრელოში და აჭარაში ”ნაციონალები” მოიგებენ. ეგრე არ არის, როგორც კი მთავრობა აღიარებს, რომ ერთ-ერთ რეგიონში არჩევნები წაგებული აქვს, ე.ი. ყველაფერი წაგებული აქვს. გურიაში არანაკლები სიტუაციაა, ვიდრე სამეგრელოში. სამტრედიაში პრაქტიკულად პირველი ტურში 50%-ზე მეტს მივიღებთ. ქუთაისს ძალიან მყარად ვიგებთ”, - განაცხადა სააკაშვილმა.
მისივე თქმით, ”ნამდვილად ვაპირებ საქართველოში ჩასვლას და არჩევნების შედეგების დაცვას. ძალიან მარტივია - რატომ არის, რომ ივანიშვილი დღე და ღამე იძახის, სააკაშვილი თუ ჩამოვა, დავიჭერთ, სააკაშვილს ასეთ საკანში ჩავსვამ, ისეთ საკანში ჩავსვამ, შუქს გამოვურთავ, ჩავურთავო, რაღაც სისულელებს იძახის. პანიკურად ეშინია ჩემი ჩასვლის. აუცილებლად უნდა გავუკეთო ის, რისიც მას პანიკურად ეშინია და მაშინ ყველაფერი თავის ადგილზე დადგება”.
