აჭარის ფინანსთა და ეკონომიკის მინისტრი რამაზ ბოლქვაძე უცხოელ ინვესტორებს შეხვდა. მინისტრმა რეგიონით დაინტერესებულ ბიზნესმენებს აჭარის საინვესტიციო გარემო, საპრივატიზაციო ობიექტები,საქართველოში არსებული ბიზნესის საკანონმდებლო რეგულაციები და რეგიონში ამ დროისთვის მიმდინარე საინვესტიციო პროექტები გააცნო.
"რეგიონში ბოლო წლებში განხორციელებული ინვესტიციის მზარდი დინამიკა კიდევ ერთი მაგალითია იმისა, რომ აჭარას აქვს უდიდესი საინვესტიციო პოტენციალი, განვითარების დიდი შესაძლებლობა. 2016 წლის 6 თვის მონაცემებით აჭარაში უცხოურ ინვესტიციებზე ორჯერ მეტი წილი 154.2 მილიონი აშშ დოლარი მოდის. ეს ნიშნავს,რომ ჩვენი უცხოელი პარტნიორები ენდობიან ჩვენს საინვესტიციო გარემოს, ისინი თავს დაცულად გრძნობენ აჭარაში და თქვენი ვიზიტი კიდევ ერთხელ ადასტურებს ამას.
ჩვენ ვართ ღია თქვენთან თანამშრომლობისთვის. მზად ვართ მხარი დავუჭიროთ რეგიონის განვითარებისკენ მიმართულ თქვენს ყველა ინიციატივას"-განაცხადა რამაზ ბოლქვაძემ შეხვედრაზე.
სასტუმრო „კასტელო მარეში“ გამართული შეხვედრისას ინვესტიორებს აჭარის რეგიონის შესახებ მომზადებული სპეციალური პრეზენტაციის და ასევე საინვესტიციო ვიდეო რგოლის ნახვის შესაძლებლობა ჰქონდათ.
აჭარის ფინანსთა და ეკონომიკის მინისტრთან შეხვედრაზე ინვესტორებმა აჭარაში სამშენებლო და ტურიზმის სფეროში ინვესტიციის განხორციელების ინტერესი გამოთქვეს. შეხვერდაზე საუბარი მხარეებს შორის სამომავლო თანამშრომლობას შეეხო. აჭარის რეგიონის დატოვებამდე ინვესტორები აჭარაში მიმდინარე და განხორციელებულ საინვესტიციო პროექტებს ადგილზე გაეცნობიან.
