მალე ჩინეთში, სინძიანის პროვინციაში სერვის-ცენტრი გაიხსნება, სადაც საქართველოს სავაჭრო-სამრეწველო პალატის წარმომადგენლობა იმუშავებს. ცენტრი 2017 წლის იანვრისთვის დაიწყებს ფუნქციონირებას და იქ სპეციალურად პალატის წარმომადგენლობისთვის ფართი იქნება გამოყოფილი. პროექტი ჩინეთის პრეზიდენტის ინიციატივის - „ერთი გზა- ერთი სარტყელის“ ფარგლებში ხორციელდება, რომელიც ისტორიული აბრეშუმის გზის ქვეყნებს შორის (და არამარტო) ეკონომიკური და სავაჭრო ურთიერთობების გაღრმავების ხელშეწყობას ითვალისწინებს.
სინძიანის პროვინციაში, რომელიც „ერთი გზა- ერთი სარტყელის“ ერთ-ერთი მნიშვნელოვანი ნაწილია სამუშაო ვიზიტით საქართველოს სავაჭრო-სამრეწველო პალატის პრეზიდენტი იმყოფება. ნინო ჩიქოვანი უკვე შეხვდა „ხინ ჯიანგ ლინ ჯუნ ში იე ჰოლდინგის“ დამფუძნებელს. სწორედ უანგ ლინ ჯუნი უხელმძღვანელებს სერვის ცენტრის პროექტს, სადაც „ერთი გზა -ერთი სარტყელის“ ინიციატივაში ჩართული 25-მდე ქვეყნის წარმომადგენლობა იმუშავებს. პროექტის ხელმძღვანელი „ერთი გზა-ერთი სარტყელის“ ინიციატივის ფარგლებში განსახორციელებელი სერვის ცენტრის პროექტის დეტალების გასარკვევად თავადაც იმყოფებოდა საქართველოში.
გარდა სერვის ცენტრის პროექტისა და საქართველოს სავაჭრო-სამრეწველო პალატისთვის ფართის გამოყოფის საკითხებისა, მხარეები ქვეყნებს შორის ეკონომიკური და სავაჭრო ურთიერთობების გაღრმავების ხელშეწყობაზეც შეთანხმდნენ. ამ კუთხით დიდ როლს ითამაშებს პალატის წარმომადგენლობის სინძიანის პროვინციაში მუშაობა.
