სამოქალაქო ავიაციის სააგენტოს წარმომადგენლებმა აშხაბადის საერთაშორისო აეროპორტის ახალი ტერმინალის საზეიმო გახსნის ღონისძიებაში მიიღეს მონაწილეობა.
ოფიციალურ ცერემონიაზე, რომელიც 17 სექტემბერს გაიმართა, ქართული მხარე თურქმენეთის სამოქალაქო ავიაციის სახელმწიფო დეპარტამენტის მიწვევით იმყოფებოდა. 2.23 მილიარდი დოლარის ღირებულების ახალი ტერმინალი აღჭურვილია თანამედროვე აერონავიგაციური ტექნოლოგიებით და მგზავრთა 15 გასასვლელით. შენობა თურქულმა კომპანია “Polimeks”-მა ააგო. აეროპორტი წელიწადში 14 მილიონი მგზავრის გატარებას გეგმავს.
საავიაციო ინფრასტრუქტურის განვითარების პარალელურად, თურქმენეთი აქტიურად მუშაობს რეგიონის ქვეყნებთან საავიაციო მიმოსვლის დასამყარებლად. სწორედ ამ მიზნით, აშხაბადის აეროპორტის ტერმინალის გახსნის ღონისძების ფარგლებში, კიდევ ერთხელ გაიმართა შეხვედრა თურქმენეთისა და საქართველოს საავიაციო ხელისუფლებების პირველ პირებს შორის, სადაც შეჯამდა ორ ქვეყანას შორის რეგულარული ფრენების დასაწყებად გატარებული საორგანიზაციო-ტექნიკური სამუშაოები. ასევე განხილულ იქნა უწყებების მიერ, ლიბერალურ პრინციპებზე დაფუძნებული ახალი საავიაციო შეთანხმების შემუშავების მიზნით განხორციელებული ნაბიჯები (ამჟამად ძალაშია 1993 წლის 17 აგვისტოს შეთანხმება).
საავიაციო ხელისუფლებები ერთმანეთს პირველად აშხაბადში მიმდინარე წლის 4 ივლისს შეხვდნენ. შეხვედრაზე გაფორმდა ურთიერთგაგების მემორანდუმი საავიაციო ხელისუფლებებს შორის, რომლის საფუძველზე, მხარეთა ავიასაწარმოებს უფლება ეძლევათ განახორციელონ პირდაპირი საჰაერო მიმოსვლა საქართველოსა და თურქმენეთის ნებისმიერ დანიშნულების პუნქტს შორის, ყოველგვარი შეზღუდვის გარეშე. აქამდე საჰაერო მიმოსვლა მხოლოდ ორი ქვეყნის დედაქალაქს შორის იყო შესაძლებელი. ამავე შეხვედრაზე იქნა მიღებული გადაწყვეტილება აშხაბადსა და თბილისს შორის რეგულარული სამგზავრო მიმოსვლის დაწყების თაობაზე. ამჟამად, საქართველოში ოპერირების ნებართვის მისაღებად „თურქმენეთის ავიახაზები“ (Türkmenhowaýollary) სამოქალაქო ავიაციის სააგენტოსთან ბოლო დეტალებს ათანხმებს.
