ეგვიპტემ რუსეთიდან ხორბლის იმპორტი შეაჩერა, ეს იმ ფონზე როდესაც ქვეყნის მთლიან მოხმარებაში რუსული ხორბლის წილი 65%-ის შეადგენდა. რუსული ხორბლისათვის ეგვიპტე ერთ-ერთი ძირითადი მომხმარებელი იყო, რადგანაც გასულ სეზონზე რუსეთმა საკუთარი საექსპორტო ხორბლის მეოთხედი სწორედ ეგვიპტეში გაყიდა.
ამ ფონზე სავარაუდოა, რომ რუსეთს ხორბლის ფასი გაიაფება მოუწიოს და საქართველომ რუსული ხორბალი უფრო დაბალ ფასად შეისყიდოს.
ხორბლისა და ფქვილის მწარმოებელთა ასოციაციის ხელმძღვანელი ლევან სილაგავა აცხადებს, რომ ეგვიპტის მიერ რუსულ ხორბალზე უარის თქმა და რუსული ხორბლის შესაძლო გაიაფება, ხორბლის მსოფლიო ბაზარს არ დაეტყობა.
„ეს მსოფლიო ბაზარს არ დაეტყობა იმიტომ, რომ ეგვიპტემ 10 მლნ ტონა ხორბალი, რომელსაც ყოველწლიურად ყიდულობს, აუცილებლად უნდა იყიდოს რათა საკუთარი მოსახლეობა გამოკვებოს.
რუსეთში შესაძლოა წარმოიქმნას ისეთი სიტუაცია, რომ ფასები წამოვიდეს ძირს. ეს იმ ფონზე, როდესაც ხორბალი ისედაც ძალიან გაიაფებულია. შესაბამისად თუ კი ხორბლის გაიაფება მოხდება, ეს იქნება ჩვენთვის მომგებიანი, რათა იაფად ნაყიდი ხორბლის ფონზე გაიაფდება ფქვილიც.
დღეს ფქვილის ფასი ისტორიულ მინიმუმს უახლოვდება. ერთი ტომარა ფქვილის მინიმალური ფასი დღესათვის 33 ლარია. ფქვილის ფასი ყველაზე მინიმალური კი დაფიქსირდა 2007 წელს, როდესაც 1 ტომარა ფქვილის ღირებულება 31 ლარს შეადგენდა“, აცხადებს ლევან სილაგავა.
ამ დროისათვის ფოთის პორტში შემოტანილი ხორბლის ფასი 185 დოლარია. ხორბლისა და ფქვილის მწარმოებელთა ასოციაციის ხელმძღვანელი მიიჩნევს, რომ თუ კი რუსული ხორბლის გაიაფება დაიწყება ეს დაახლოებით ტონაზე 5-10 დოლარის ფარგლებში მოხდება.
„რუსეთშიც არ არის ერთგვაროვანი მდგომარეობა. ფაქტობრივად ფასედბი გაჩერდა. რუსეთის საექპორტო რაიონებია: სტავროპოლი, კრასნოდარი. ამ მხარეებში ხორბალი უკვე აიღეს და დააბინავეს. საექსპორტო პოტენციალი ამოწურეს და გაიტანეს რაც გასატანი იყო. ეხლა მიმდინარეობს ხორბლის აღება რუსეთის შუა ნაწილში და შემდეგ იქნება ციმბირში. შესაბამისად ხორბალის მოტანა, რომ მოხდეს პორტამდე მას სჭირდება შესაბამისი ლოჯისტიკა- ტრანსპორტირება. შესაბამისად ლოჯისტიკის ღირებულება აბალანსებს გაიაფებულ ხორბალს და ფასი არის გაჩერებული.
დიდი რყევებას არ ველოდები. შესაძლოა ხორბლის ფასი 5-10 დოლარის ფარგლებში კიდევ გაიაფდეს, რამაც ფქვილი 1-2 ლარით გააიაფოს. თუმცა კიდევ ერთხელ ვიმეორებ, რომ ფქვილი დღეს ძალიან იაფია. შარშან ამ დროს 1 ტომარა ფქვილის ფასი 45 ლარი იყო, დღეს კი 33 ლარია“.
თუმცა ეს მხოლოდ პროგნოზია. რუსეთი ექსპორტის დივერსიფიცირებას ახდენს და მან ფაქტობრივად წაართვა საექსპორტო მიმართულებები, მაგალითად აზიის ბაზრებს, ავსტრალიას, საფრანგეთს და ა.შ.
რუსეთმა შესაძლოა ეგვიპტის ნაკადები იქეთ გადაამისამართოს, მაშინ ფასები სავარაუდოდ უმნიშვნელოდ შემცირდება", აცხადებს სილაგავა.
