საქართველოს სავაჭრო-სამრეწველო პალატის ორგანიზებით თბილისში რეგიონული ბიზნესის ფორუმი გაიმართა. ღონისძიებას, რომელიც სასტუმრო „მილენიუმ ბილტმორში“ გაიმართა საქართველოს ყველა რეგიონიდან 200-ზე მეტი მეწარმე დაესწრო.
ფორუმი საქართველოს სავაჭრო-სამრეწველო პალატის პროექტის - „ღია დიალოგი ბიზნესთან დასკვნითი ღონისძიება იყო, რომელიც ბიზნესის პრობლემების მთავრობისთვის გაცნობას ემსახურებოდა. რეგიონულ ბიზნესის ფორუმს ქვეყნის პირველი ვიცე-პრემიერი, ენერგეტიკისა და სოფლის მეურნეობის მინისტრები, ასევე სხვა და სხვა სამთავრობო უწყებების ხელმძღვანელი პირები ესწრებოდნენ.
ფორუმი საქართველოს სავაჭრო-სამრეწველო პალატის პრეზიდენტმა - ნინო ჩიქოვანმა გახსნა, შემდეგ კი საზოგადოებას სიტყვით ქვეყნის პირველმა ვიცე-პრემიერმა- დიმიტრი ქუმსიშვილმა მიმართა. ღონისძიებაზე წარმოდგენილი იყო სამთავრობო უწყებების პრეზენტაციები - რეგიონებში ჩატარებული შეხვედრების დროს წამოწეული პრობლემატიკის შესაბამისად. ღონისძიების ძირითადი ნაწილი დაეთმო ღია დიალოგის ფორმატს, რომლის ფარგლებშიც თითოეულ მეწარმეს საშუალება ჰქონდა საკუთარი ხმა მთავრობისთვის მიეწვდინა და პრობლემებისა და მათი გადაჭრის გზების შესახებ მათთან ერთად ემსჯელა.
პალატის მიერ რეგიონებში ჩატარებული შეხვედრების შედეგად გამოკვეთილი პრობლემატური საკითხების მიხედვით შეირჩა რამდენიმე სამთავრობო უწყება, რომელთა პრეზენტაციებიც გაიმართა საათნახევრიანი ღია დიალოგის შემდეგ. სსიპ „სურსათის ეროვნული სააგენტო“ - თაფლისა და თხილის წარმოებასთან დაკავშირებული პრობლემების გამო შეირჩა, რომლებიც თავს ძირითადად სამეგრელოში იჩენენ. ასევე პროდუქციის ხარისხის კონტროლის მექანიზმის შესახებ დასმული კითხვების გამო, რაც თითქმის ყველა რეგიონში აქტუალურია. სსიპ „ქონების ეროვნული სააგენტო“-ს პრეზენტაცია სასოფლო-სამეურნეო მიწის პრივატიზაციასთან დაკავშირებით ხშირად დასმული კითხვების გამო გახდა აქტუალური, რაც შეეხება სსიპ „მეწარმეობის განვითარების სააგენტო“-ს ის მეწარმეთა იაფი სესხებით დაინტერესების გამო შეირჩა. ასევე საქართველოს რეგიონებში მოღვაწე მეწარმეთა კითხვები ხშირად მიწის რეგისტრაციას უკავშირდება, რის გამოც ღონისძიებაზე ერთ-ერთი პრეზენტატორი სსიპ „საჯარო რეესტრის ეროვნული სააგენტო“ იყო. საგადასახადო თემატიკის კუთხით დასმულ კითხვებს კი რეგიონული ბიზნესის ფორუმის ფარგლებში სსიპ „შემოსავლების სამსახური“-ის ხელმძღვანელმა პირებმა უპასუხეს. პრეზენტატორები ძირითადად უწყებათა ხელმძღვანელი პირები იყვნენ, იმის გამო, რომ ამომწურავად გაცემოდა პასუხი მეწარმეთა შეკითხვებს ყველა მიმართულებით.
პროექტი „ღია დიალოგი ბიზნესთან“ 2016 წლის განმავლობაში საქართველოს სავაჭრო-სამრეწველო პალატისთვის ერთ-ერთი პრიორიტეტი იყო. პრეზიდენტი და პალატის გუნდი რეგიონებში ბიზნეს-სექტორს ხვდებოდნენ და კონკრეტული პრობლემების მოსმენის შემდეგ მათი გადაჭრის გზებზე მუშაობდნენ. პროექტი ზუგდიდიდან დაიწყო, სადაც პალატა სამეგრელო-ზემო სვანეთის ბიზნეს-სექტორს შეხვდა, შემდეგ კი კონკრეტული პროექტებით გერმანიის საერთაშორისო თანამშრიომლობის ფონთან (GIZ) და სურსათის ეროვნულ სააგენტოსთან ერთად ჩავიდა. „ღია დიალოგი ბიზნესთან“-ს ფორმატში დაგეგმილ შეხვედრებში მონაწილეობას სავაჭრო-სამრეწველო პალატის წევრი და არაწევრი მეწარმეები იღებდნენ. პროექტის ფარგლებში შეხვედრები კახეთში, მცხეთა - მთიანეთში, რაჭაში, სამცხე-ჯავახეთში, აჭარაში, სამეგრელოში, ქვემო ქართლში, იმერეთში, გურიაში და შიდა ქართლში შედგა.
რეგიონული ბიზნესის ფორუმის ფარგლებში თბილისში მეწარმეები საქართველოს თითქმის ყველა რეგიონიდან ჩამოვიდნენ. ღონისძიება, რომელიც მიუნხენისა და ზედა ბავარიის პალატის მიერ იყო დაფინანსებული 4 საათს გაგრძელდა. საჯაროდ გამოსხვლების პარალელურად მონაწილეებს საშუალებს ჰქონდათ სამთავრობო უწყებების წარმომადგენლებისთვის კითხვები უშუალოდ დაესვათ.
