2015–2016 წლებში საქართველოში 9 ახალი ავიაკომპანია შემოვიდა, აღნიშნულის შესახებ განცხადება საქართველოს პრემიერ-მინისტრმა გიორგი კვირიკაშვილმა ქვეყნის სივრცითი მოწყობის პროექტის პრეზენტაციისას განაცხადა.
როგორც გიორგი კვირიკაშვილმა განმარტა, დღეისთვის ქვეყანაში 12 აეროპორტია, საიდანაც მხოლოდ სამია საერთაშორისო სტატუსის მატარებელი.
ქვეყნის მასშტაბით 5 აეროპორტიდან სრულდება სამგზავრო ავიარეისები: თბილისი, ქუთაისი, ბათუმი, მესტია, ნატახტარი.
„ვინაიდან ტურისტთა რაოდენობა უშუალოდ დამოკიდებულია პირდაპირი რეისების რაოდენობაზე, ფრენების გეოგრაფიასა, სიხშირეზე და ავიაბილეთების ხელმისაწვდომობაზე, ჩვენ ძალიან ინტენსიურად ვმუშაობთ ამ მიმართულებით. მხოლოდ 2015–2016 წლებში საქართველოში შემოვიდა 9 ახალი ავიაკომპანია.
დღეისთვის საჰაერო გზით ჩამოსულ ტურისტთა ძირითადი რაოდენობა მოდის თბილისის აეროპორტზე. ჩვენი ამოცანაა, ამ მიმართულებით მოხდეს დივერსიფიკაცია და განვავითაროთ დანარჩენი აეროპორტები. ქუთაისში, დღეს არსებულ 4 საერთაშორისო რეისს 7 ახალი რეისი დაემატება ევროპის მიმართულებით. ასევე, ქუთაისში ბევრი ჩარტერული ფრენა სრულდება და მის განვითარებას ძალიან დიდი პერსპექტივა აქვს. უძრავი ქონებით დაინტერესებულ ადამიანებს მოგიწოდებთ, დაინტერესდეთ ამ მიმართულებით, რადგან ძალიან საინტერესო პოტენციალი იქნება საქართველოში.
თვის ბოლოს დავასრულებთ ამბროლაურის ასაფრენ-დასაფრენი ზოლის მშენებლობას, რომელიც ერთი კვირის წინ დავიწყეთ და ასე სწრაფი ტემპით ვასრულებთ, დარწმუნებული ვარ, მექნება საშუალება, პირადად განვახორციელო ფრენა ამ მიმართულებით. ასევე, აშენდება თანამედროვე დიზაინის, სრულიად ახალი სამგზავრო ტერმინალი, რომელიც მოემსახურება რაჭა-ლეჩხუმის მიმართულებას და რამდენიმეჯერ გაზრდის ამ მიმართულების მიმზიდველობას ტურისტებისთვის“, განაცხადა პრემიერ-მინისტრმა.
კვირიკაშვილი აცხადებს, რომ ზუგდიდის აეროპორტის მშენებლობა მომავალ წელს დაიწყება. ასევე აუცილებლად განვიტარდება თელავის აეროპორტიც.
„ვფიქრობთ, ახალქალაქში არსებული აეროდრომიც გავარემონტოთ და დავასრულოთ აეროპორტის მშენებლობაც, რომ ამ მიმართულებით ფრენა იყოს შესაძლებელი. ასევე, ვფიქრობთ, ომალოში ავაშენოთ მცირე აეროდრომი, რომელიც აუცილებელი იქნება თუშეთის განვითარებისთვის. თუშეთისკენ მიმავალი გზა უნდა გაუმჯობესდეს, უნდა მოხდეს მისი თანამედროვე სტანდარტებთან შესაბამისობაში მოყვანა, უსაფრთხოების გაუმჯობესება, რათა ტურისტებისთვის უსაფრთხო გახდეს ამ მიმართულებით მგზავრობა და უპირველეს ყოვლისა. ადგილობრივი მცხოვრებლებისთვის თუშეთი იყოს ხელმისაწვდომი. ამ გეგმებში ეს ყველაფერი შედის და 2020 წლამდე ეს იქნება ჩვენთვის ერთ-ერთი ძალიან მნიშვნელოვანი მიმართულება“, აცხადებს პრემიერ-მინისტრი.
