თბილისი (GHN) - მიმდინარე წელს საქართველოს ტერიტორიულ წლებში არც ერთი საკრუიზო ხომალდი არ შესულა. სტატისტიკური ინფორმაციის მიხედვით, 2015 წელს ბათუმის პორტში 11 საკრუიზო ხომალდი შევიდა, რომელმაც საქართველოს შავი ზღვის პირეთში 4 ათას 551 ტურისტი შეიყვანა. ბოლო წლების სტატისტიკას თუ გადავხედავთ, ყველაზე მეტი საკრუიზო ხომალდი ბათუმის პორტში 2014 წელს შევიდა. საუბარია 33 საკრუიზო ხომალდსა და 14 ათას 793 ტურისტზე.
2016 წელს ბათუმის პორტში საკრუიზო ხომალდების არარსებობას ნაწილობრივ გეოპოლიტიკურ მოვლენებს უკავშირებენ აჭარის ტურიზმის დეპარტამენტში.
მათი ინფორმაციით, აჭარაში საკრუიზო ტურიზმის განვითარებისთვის სახელმწიფო სტრუქტურებიგან დამოუკიდებელი რიგი საკითხებია მოსაწესრიგებელი, მათ შორისაა ბათუმის პორტის რეაბილიტაცა.
აჭარის ტურიზმის დეპარტამენტში განმარტავენ, რომ საკრუიზო ტურიზმი საქართველოსთვის ერთ-ერთ პრიორიტეტულ მიმართულებად რჩება.
„ამაზე მეტყველებს რიგი ღონისძიებებისა, რომელსაც ადგილობრივი და ცენტრალური მთავრობა ახორციელებს. ვგულისხმობ, საკრუიზო ტურიზმის განვითარების სტრატეგიას, რომელიც რეგიონულმა მთავრობამ, აჭარის ტურიზმის დეპარტამენტმა რეგიონში საკრუიზო ტურიზმის განვითარების მიზნით შეიმუშავა. სტრატეგიის განხორციელებისთვის ერთ-ერთი მთავარი ფაქტორი ბათუმის პორტის რეაბილიტაცა და იქ განსახორციელებელი ინფრასტრუქტურული სამუშაოებია, რასთან დაკავშირებითაც პორტის მენეჯმენტთან შეხვედრები უკვე იყო. ჩვენ ვიცით ყაზახური მხარის მზაობის შესახებაც, თუმცა აჭარაში საკრუიზო ტურიზმის განვითარებისთვის მოსაგვარებელია სახელმწიფო სტრუქტურებიგან დამოუკიდებელი რიგი საკითხებისა.
მათ შორისაა, ჩვენი რეგიონის ირგვლივ განვითარებული გეოპოლიტიკური მოვლენები, რომელიც თავის გავლენას ახდენს საკრუიზო ტურიზმის განვითარებაზე. აჭარაში საკრუიზო გემები ძირითადად, თურქეთისა და ყირიმის გავლით შემოდიან, წელს კი ტურიზმის ამ მიმართულებას პრობლემები შეექმნა აღნიშნულ რეგიონებში იქ არსებული დაძაბული საომარი და პოლიტიკური მდგომარეობის გამო. ამან კი თავის მხრივ გადამწყვეტი როლი ითამაშა აჭარაში საკრუიზო გემების შემოსვლაზე“, - განმარტავენ აჭარის ტურიზმის დეპარტამენტში.
დეპარტამენტში აცხადებენ, რომ სახელმწიფო სტრუქტურები ამ მიმართულებით მუშაობას აგრძელებენ, რაც შედეგს უახლოეს მომავალში გამოიღებს.
„იმისთვის, რომ აჭარაში საკრუიზო ტურიზმი განვითარდეს, პირველ რიგში, აუცილებელია, ამოქმედდეს საკრუიზო ტურიზმის განვითარების სტრატეგია, რომელიც რამდენიმე მნიშვნელოვან საკითხს ითვალისწინებს. ეს მიდგომა არის კომპლექსური და სტრატეგიის ტექნიკური განხორციელება რამდენიმე აუცილებელი პუნქტის შესრულებას მოითხოვს. ესენია შავი ზღვის პორტების თანამშრომლობა, საპორტო მოსაკრებლები და ოპეარციული პრაქტიკა, დიდი ხომალდების ბათუმის პორტში წვდომის შესაძლებლობების ზრდა და მარკეტინგის მენეჯერის დაქირავება“, აცხადებენ აჭარის ტურიზმის დეპარტამენტში.
აღსანიშნავია, რომ 12-14 სექტემბერს, საერთაშორისო საზღვაო ფორუმს აჭარა მასპინძლობს. ფორუმზე, რომელიც პრემიერ-მინისტრის პატრონაჟით ჩატარდება, ერთ-ერთი მთავარი განსახილველი საკითხი საკრუიზო ტურიზმი, არსებული გამოწვევები და მათი მოგვარების გზები იქნება.
5-9 სექტემბერს, აჭარამ ასევე უმაპისნძლა საკორდინაციო შეხვედრებს ევროკავშირის პროექტის „კომპეტენციათა ცენტრების ქსელი შავი ზღვის რეგიონის საკურიზო ტურიზმის განვითარების მიზნებისთვის“ ფარგლებში, რომელსაც ევროკავშირის, უკრაინისა და საქართველოს ცნობილი უნივერსიტეტების პროფესორები, სტუდენტები, ტურიზმის დარგის სპეციალისტები, ბიზნესისა და სახელმწიფო სტრუქტურების წარმომადგენლები ესწრებოდნენ.
საკრუიზო ტურიზმის სტატისტიკა 2012 – 2015 წწ.
2012 წ. - 10 საკრუიზო ხომალდი: 3’632 ტურისტი
2013 წ. - 16 საკრუიზო ხომალდი: 5’162 ტურისტი
2014 წ. - 33 საკრუიზო ხომალდი: 14’793 ტურისტი
2015 წ. - 11 საკრუიზო ხომალდი: 4’551 ტურისტი
