2016 წლის გაზაფხული/ზაფხულის თბილისის მოდის კვირეულზე საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტოს მხარდაჭერით საფეიქრო ინდუსტრიის წარმოსაჩენად თბილისი მოლის მთავარ ატრიუმში განთავსდა სტენდი, სადაც ადგილობრივი საფეიქრო ფაბრიკები, და მათ შორის შპს "ლაზეთი" საკუთარ პროდუქციას წარმოადგენდნენ.
აღნიშნული ღონისძიების ფარგლებში შპს „ლაზეთის“ პროდუქცია იმდენად წარმატებულად გაიყიდა, რომ მწარმოებლებმა საკუთარი მაღაზიის გახსნა და ბიზნეს საქმიანობის გაფართოება გადაწყვიტეს.
სწორედ კომპანიის პროდუქციისადმი დიდი ინტერესის გათვალისწინებით 11 სექტემბერს, თბილისი მოლში, მეორე სართულზე 16:00 საათზე, ახალი ქართული ბრენდის „ლაზეთი“ პირველი მაღაზია გაიხსნება, სადაც წარმოდგენილი იქნება ქალის სამოსი ყველა ტიპის სეზონის მიხედვით.
როგორც სააგენტოში ამბობენ, პროდუქციის დიზაინი მოერგება მსოფლიო მოდის ტენდენციებს და გათვალისწინებული იქნება , ქართული ბაზარის საჭიროებები და მომხმარებლის მოთხოვნები. ამ ეტაპზე მაღაზია ორიენტირებულია ადგილობრივ ბაზარზე, თუმცა გეგმავს პოტენციურ უცხოელ „ბაიერებთან“ თანამშრომლობასა და პროდუქციის მრავალფეროვნების გაზრდას.
აღსანიშნავია, რომ უკვე რამდენიმე სეზონია, მეწარმეობის განვითარების სააგენტო აქტიურად უწყობს ხელს ქართველი დიზაინერების ნამუშევრებისა თუ კომპანიების ნაწარმის საზღვრებს გარეთ გატანას და მსოფლიო ბრენდებსა და ქართველ დიზაინერებს შორის კავშირების დამყარებას.
