ნატო-ს მტკიცედ აქვს გადაწყვეტილი, დაეხმაროს საქართველოს ალიანსის წევრობის მიღწევაში, - განაცხადა იენს სტოლტენებერგმა ჩრდილოატანტიკური საბჭოსა და საქართველოს პარლამენტის წევრების შეხვედრის დაწყებისას. ალიანსის გენერალურმა მდივნმა თბილისში ჩრდილოატლანტიკური საბჭოს ვიზიტის მნიშვნელობაზე ისაუბრა.
“ნება მომეცით, მოგილოცოთ დამოუკიდებლობის აღდგენიდან 25-ე წლისთავი. ჩრდილოატლანტიკური საბჭოს ვიზიტი საქართველოში არის მნიშვნელოვანი გზავნილი მთელი მსოფლიოსთვის, რომ ნატო მტკიცედ უჭერს მხარს საქართვეოს ტერიტორიულ მთლიანობას და სუვერენიტეტს. ეს ასევე არის გზავნილი საქართველოსა და ნატო-ს შორის უწყვეტი და მჭიდრო პარტნიორობის შესახებ”, - განაცხადა სტოლტენბერგმა.
ალიანსის გენერალურმა მდივანმა მაღალი შეფასება მისცა საქართველოს დემოკრატიული ინსტიტუტების გაძლიერებაში საქართველოს პარლამენტის წევრების როლს. სტოლტენბერგის თქმით, საქართველომ მნიშვნელოვან პროგრესს მიაღწია რეფორმების გზაზე, რაც ქვეყანას ნატო-ს წევრობისთვის მომზადებაში ეხმარება.
“იმის გათვალისწინებით, რომ საქართველო უახლოვდება არჩევნებს მომავალ თვეს, მსურს გამოვიყენო ეს შესაძლებლობა და მაღალი შეფასება მივცე საქართველოს პარლამენტის წევრების მოღვაწეობას საქართველოს დემოკრატიული ინსტიტუტების გაძლიერებაში. საქართველომ ძალიან მნიშვნელოვან პროგრესს მიაღწია ფუნდამენტური საარჩევნო რეფორმების გზაზე, თქვენ გააძლიერეთ კანონის უზენაესობა და ასევე აგრძელებთ რეფორმებს თავდაცვისა და უსაფრთხოების სფეროში. აღნიშნული რეფორმების ძალისხმევა მნიშვნელივანია ქართველი ხალხისთვის და ეხმარება საქართველოს იმ სტანდარტების დაკმაყოფილებაში, რომლებიც საჭიროა ნატო-ს წევრობისვითვის მოსამზადებლად. ჩვენ მტკიცედ გვაქვს გადაწყვეტილი, დავეხმაროთ საქართველოს ნატო-ს წევრობის მიღწევაში”, - განაცხადა იენს სტოლტენბერგმა.
