საქართველოს ეროვნული საინვესტიციო სააგენტოს ხელშეწყობით, კომპანია “ჰენკელი“ საქართველოში ახალი წებოვანი სამშენებლო მასალების საწარმოს გახსნის.
საწარმო 14 სექტემბერს გარდაბნის რაიონის სოფელი მარტყოფში გაიხსნება და მის გახსნას მთავრობის წარმომადგენლებიც დაესწრებიან.
საქართველოს ეროვნულ საინვესტიციო სააგენტოში განმარტავენ, რომ ახალი ქარხანა იქნება „ჰენკელის“ პირველი საწარმო საქართველოში. იგი ადგილობრივი ბაზრისთვის გამოუშვებს ცნობილი ბრენდის Ceresit–ის სამშენებლო წებოვან მასალებს. იგი გამოიყენებს უახლეს ტექნოლოგიებს რათა უზრუნველყოს ბუნებრივი რესურსების ეფექტური გამოყენება, რაც უზრუნველყოფს გარემოზე მინიმალურ ზეგავლენას.
აღსანიშნავია, რომ „ჰენკელი“ მსოფლიოს მასშტაბით საქმიანობს და ცნობილია წამყვანი ბრენდებითა და ტექნოლოგიებით ბიზნესის სამ სფეროში: სარეცხი და სახლის მოვლის საშუალებები, სილამაზე და მოვლის საშუალებები და წებოვანი ტექნოლოგიები. ჰენკელი დაარსდა 1876 წელს და ფლობს მსოფლიოში წამყვან საბაზრო პოზიციებს როგორც სამომხმარებლო, ასევე საწარმოო საქმიანბაში ისეთი კარგად ცნობილი ბრენდებით როგორიცაა პერსილი, შვარცკოფი და ლოქტიტი. ჰენკელს დასაქმებული ჰყავს 50, 000 ადამიანი, 2014 წელს მისმა გაყიდვებმა შეადგინა 16,4 მილიარდი ევრო, ხოლო დაზუსტებულმა საოპერაციო მოგებამ 2,6 მილიარდი ევრო. ჰენკელის პრივილეგირებული აქციები განთავსებულია გერმანიის საფონდო ინდექსში DAX.
