პარლამენტის იურიდიულმა კომიტეტმა უზენაესი სასამართლოს მოსამართლეობის კანდიდატებს მხარი დაუჭირა. პრეზიდენტის წარდგენილ კანდიდატებს კენჭს ხვალინდელ პლენარულ სხდომაზე უყრიან.
დღევანდელ კენჭისყრაში იურიდიული კომიტეტის 7-მა წევრმა მიიღო მონაწილეობა. ლევან ბოძაშვილის კანდიდატურას ყველა მათგანმა დაუჭირა მხარი, ნონა თოდუას და თამარ ლალიაშვილს კი, 5-5-მა დეპუტატმა.
გიორგი მარგველაშვილმა უზენაესი სასამართლოს მოსამართლეობის კანდიდატებად პარლამენტს ნანა თოდუა და თამარ ლალიაშვილი ხელმეორედ, 27 ივნისს წარუდგინა. პირველი წარდგენისას, პარლამენტმა მათ მხარი არ დაუჭირა. რაც შეეხება ლევან ბოძაშვილს, პრეზიდენტმა მისი კანდიდატურა ივლისში, ანა დოლიძის ნაცვლად წარადგინა. თავად ანა დოლიძე კი, პრეზიდენტის საპარლამენტო მდივანი გახდა.
პარლამენტის საშემოდგომო სესია ბიუროს სხდომით, დღეს გაიხსნა. საშემოდგომო სესიის პირველი პლენარული სხდომა ხვალ არის ჩანიშნული, თუმცა უმრავლესობის წევრები ვარაუდობენ, რომ მოქმედი პარლამენტი პლენარული სხდომის ფორმატში შეკრებას და გადაწყვეტილებების მიღებას ვეღარ შეძლებს.
