„ქართული ოცნება - დემოკრატიული საქართველოს“ წარმომადგენელი თამარ ჩუგოშვილი პარტიის მხარდამჭერებს მიმართავს და მოუწოდებს, მოსალოდნელ პროვოკაციებს არ აყვნენ. დღეს გამართულ პრესკონფერენციაზე მან განაცხდა, რომ ,,ნაციონალური მოძრაობა“, რომელიც ,,ერთმნიშვნელოვნად აგებს საპარლამენტო არჩევნებს და, რომელსაც არ გააჩნია საზოგადოების მხარდაჭერა, ერთადერთ შანსს ხედავს არეულობის შექმნაში“.
როგორც ჩუგოშვილმა განაცხადა, სამწუხაროდ, ოპონენტების მიერ დაგეგმილია დაპირისპირების პროვოცირება "ქართული ოცნების" მიერ ორგანიზებულ სხვადასხვა ღონისძიებებზე,ასევე ორგანიზებული ფორმით დაძაბულობისა და დაპირისპირების შეტანა წინასაარჩევნო კამპანიაში.
"ჩვენი ქვეყნისთვის ძალიან მნიშვნელოვანია, რომ მომავალმა საპარლამენტო არჩევნებმა ჩაიაროს მშვიდ გარემოში, რაზეც პასუხისმგებლობა ეკისრება არამხოლოდ მმართველი პარტიას, არამედ ყველა პოლიტიკურ ძალას. მივმართავთ თხოვნით ადგილობრივ და საერთაშორისო დამკვირვებლებს, განსაკუთრებულად გაამახვილონ ყურადღება ისეთ ფაქტებზე და შემთხვევებზე, რომლემაც შესაძლოა, ზიანი მიაყენონ არჩევნების მშვიდ გარემოში ჩატარებას. მოვუწოდებთ ჩვენს მხარდამჭერებს, არავითარ შემთხვევაში არ გამოიყენონ მსგავსი მეთოდები და არ აყვნენ არანაირი ტიპის პროვოკაციებს, არ დაუშვან ამგვარი ინციდენტები. მიუხედავად ცალკეული მცდელობებისა, რომ საარჩევნო გარემო დაზიანდეს, დარწმუნებულები ვართ, რომ ჩვენ ჩავატარებთ ყველაზე თავისუფალ და სამართლიან არჩევნებს ჩვენი ქვეყნის დამოუკიდებლობის ისტორიაში", - აღნიშნა ჩუგოშვილმა.
