საქართველო მსოფლიო საფოსტო კონგრესში მიიღებს მონაწილეობას, რომელიც 19 სექტემბრიდან 7 ოქტომბრამდე, თურქეთის ტურისტულ დედაქალაქ სტამბულში გაიმართება.
როგორც ეკონომიკისა და მდგრადი განვითარების სამინისტროში განმარტავენ, რიგით 26-ე მსოფლიო საფოსტო კონგრესი, რომელსაც ამ ეტაპზე თურქეთი მასპინძლობს, ოთხ წელიწადში ერთხელ იმართება. სწორედ ამ კონგრესზე ხდება სამომავლო სამოქმედო გეგმის შემუშავება.
სტამბულში დაგეგმილ კონგრესზე მოხდება მსოფლიო საფოსტო კავშირის გენერალური დირექტორის, მისი მოადგილის და ასევე საოპერაციო საბჭოსა და ადმინისტრაციული საბჭოს წევრების არჩევა.
კონგრესზე საქართველო საოპერაციო საბჭოსა და ადმინისტრაციულ საბჭოში მოხვედრას შეეცდება და ამისათვის შესაბამის კენჭისყრაშიც მიიღებს მონაწილეობას.
აღსანიშნავია, რომ საქართველო დღემდე აღნიშნული საბჭოს წევრი არასოდეს ყოფილა, თუმცა ამ ეტაპზე ქვეყანას შანსი უკვე აქვს.
სტამბულში დაგეგმილ კონგრესში მონაწილეობას მსოფლიო საფოსტოს კავშირის 192 ქვეყანა მიიღებს და ღონისძიებას 2500 დელეგატზე მეტი დაესწრება.
