"კუბ თაუერი”, სადაც 5* სასტუმრო „Swiss Belhotel International"-ი უნდა განთავსდეს, ექსპლუატაციაში ერთი თვის დაგვიანებით, 2018 წლის თებერვლიდან შევა. აჭარის მთავრობა ინვესტორთან დათმობაზე წავიდა და კომპანია "ADOG-GEORGIA” -ს ვალდებულებების შესრულების პერიოდი გადაუვადა, რომელიც ბათუმში, გოგებაშვილის ქუჩაზე 30 სართულიან "კუბ თაუერს“ აშენებს.
მთავრობის გადაწყვეტილებით, "ADOG -GEORGIA” დაკისრებული ჯარიმებისგან, იმ პირობით გაანთავისუფლა, თუ კომპანია ახალ ხელშეკრულებას ზედმიწევნით შეასრულებს.
“ჩვენთვის ძალიან მნიშვნელოვანია რომ ინვესტორებთან მივაღწიოთ მიზანს და არა ის, რომ გვქონდეს მათთან ჯარიმებით ურთიერთობა, ჩვენთვის მნიშვნელოვანია რომ დაიწყოს და განხორციელდეს ყველა ის საინვესტიციო პროექტი, რომელიც აქამდე მიმდინარეობდა და მნიშვნელოვანია ამ ინვესტიციების შედეგად შეიქმნას ახალი სამუშაო ადგილები და განვითარდეს რეგიონის ეკონომიკა. ამ ეტაპზე ჩვენ მოგვმართა მხოლოდ ექვსმა ინვესტორმა, თუმცა ამ კუთხით დამატებითი კონსულტაციები მიმდინარეობს სხვადასხვა კომპანიებთან. ჩვენ განვიხილავთ ნებისმიერ შემოთავაზებას ინვესტორების მხრიდან, რადგან მათთან მიმართებაშ უნდა ვიყოთ ძალიან ფაქიზები იმიტომ, რომ ეს საკითხი რეგიონისთვის ერთ-ერთი მნიშვნელოვანი და პრიორიტეტული საკითხია” – განაცხადა აჭარის ფინანსთა და ეკონომიკის მინისტრმა რამაზ ბოლქვაძემ.
2010 წელს ,,ADOG-GEORGIA“-ს სიმბოლურ ფასად 1 ლარად საკუთრებაში გადაეცა ბათუმში, გოგებაშვილის ქ. N10-12-ის მიმდებარედ არსებული 1621 კვმ ფართის არასასოფლო-სამეურნეო დანიშნულების მიწის ნაკვეთი, სადაც ინვესტორს 2018 წლის 1-ელ იანვრამდე უნდა აეშენებინა და ექსპლუატაციაში შეეყვანა არანაკლებ 22 სართულიანი შენობა-ნაგებობა, სადაც მინიმუმ 180 ნომრიანი სასტუმრო და კაზინო უნდა განეთავსებინა. "ADOG-GEORGIA” -ს პროექტში 30 მლნ დოლარის ინვესტიცია უნდა ჩაედო.
თუმცა ინვესტორმა ვალდებულებების შესრულება დროულად ვერ მოახერხა, რასაც კომპანიაში მშენებლობის პროცესში წარმოქმნილი გაუთვალისწინებელი გარემოებებით ხსნიან.
საქმე იმაშია, რომ ადგილობრივი მაცხოვრებლები აცხადებდა, რომ ახალი მშენებლობა მომიჯნავედ მდგარ მათ სახლს აზიანებდა.
მოსახლეობის პროტესტის ფონზე სპეციალური კომისიაც შეიქმნა, რომლის მთავარი მიზანიც არსებული ვითარების დეტალური შესწავლა იყო.
„ADOG-GEORGIA“-ში კი მიიჩნევენ, რომ იმის გამო, რომ კომპანიას თავიდან აეცილებინა შემდგომი გართულებები, შემუშავდა ქვაბულის მოწყობის მეთოდოლოგია, რომელიც საინჟინრო ექსპერტიზისათვის წარედგინა ლევან სამხარაულის სახელობის სასამართლო ექსპერტიზას, რომელმაც დაადგინა, რომ ქვაბულის მოწყობის მეთოდოლოგიით წარმოებული მშენებლობა მომიჯნავედ მდებარე შენობებზე უარყოფით ზეგავლენას არ ახდენს.
"ADOG-GEORGIA” -ს 25 აგვისტოს მდგომარეობით ხელშეკრულებით ნაკისრი ვალდებულებების შეუსრულებლობისათვის 899 655 ლარის ჯარიმა ერიცხება.
აღსანიშნავია, რომ კომპანია Adog-ის მფლობელი ცნობილი აზერბაიჯანელი მილიარდერია და ის იმავდროულად აზერბაიჯანული საფეხბურთო კლუბის მფლობელიცაა.
