„ბიჯი თრეიდი“, რომელიც გონიოში სასტუმროს მშენებლობას გეგმავს, მთავრობამ დაკისრებული ჯარიმისგან გაანთავისუფლა. თუმცა კომპანიას ჯარიმა მერიასთან სასტუმროს პროექტის შეუთანხმებლობის და მშენებლობის ნებართვის მიუღებლობის გამო დაეკისრა, რაშიც ინვესტორი ნაწილობრივ ბათუმის მერიას ადანაშაულებს.
„ბიჯი თრეიდი“ აღნიშნავს, რომ ბათუმის მუნიციპალიტეტში დღემდე ვერ მოხერხდა საკუთრებაში გადაცემულ ქონებაზე ასაშენებელი ობიექტის პროექტის შეთანხმება და შესაბამისად, მშენებლობის ნებართვის მოპოვება.
აღნიშნულ საკითხზე კომპანიასა და ბათუმის მუნიციპალიტეტის მერიას შორის მიმდინარეობს სასამართლო დავა.
კომპანიის განმარტებით, დღეის მდგომარეობით მას გააჩნია ფინანსური რესურსი აღნიშნული ბიზნესპროექტის განსახორციელებლად, ხოლო რაც შეეხება სასამართლო დავას ბათუმის მერიასთან მიღწეულია სიტყვიერი შეთანხმება ასაშენებელი ობიექტის პროექტის შეთანხმებასა და შემდგომში მშენებლობის ნებართვის მოპოვებაზე.
2012 წელს შპს „ბიჯი თრეიდს“ პირდაპირი მიყიდვის ფორმით, სიმბოლურ ფასად, 1 ლარად, საკუთრებაში ბათუმში, გონიოს დასახლებაში მდებარე არასასოფლო-სამეურნეო დანიშნულების მიწის ნაკვეთი გადაეცა, სადაც მინიმუმ 30 ნომერზე გათვლილი სასტუმრო უნდა აშენებინა. ინვესტორი ვალდებული იყო, ხელშეკრულების გაფორმებიდან არაუგვიანეს 8 თვის ვადაში (11.02.2013წ) მერიასთან შეეთანხმებინა პროექტი და მოეპოვებინა მშენებლობის ნებართვა.
2013 წლის 12 თებერვლიდან 2016 წლის 25 აგვისტოს ჩათვლით, 1291 ვადაგადაცილებულ დღეზე, ინვესტორს 1 743 547,14 ლარის ჯარიმა ერიცხებოდა.
თუმცა აჭარის მთავრობამ ინვესტორის მდგომარეობა გაითვალისწინა და მისი ჯარიმისგან განთავისუფლება გადაწყვიტა. შედეად კი „ბიჯი თრეიდი“ გონიოში სასტუმროს ააშენებს და ტურისტულ ბიზნესში აქტიურად ჩაერთვება.
განახლებული პირობების მიხედვით, ინვესტორი მზადაა წინა ხელშეკრულებისგან განსხვავებით პროექტში უფრო მეტი ინვესტიცია განახორციელოს, 1 მლნ ლარის ნაცვლად 2,5 მლნ ლარი.
“ჩვენთვის ძალიან მნიშვნელოვანია რომ ინვესტორებთან მივაღწიოთ მიზანს და არა ის რომ გვქონდეს მათთან ჯარიმებით ურთიერთობა, ჩვენთვის მნიშვნელოვანია რომ დაიწყოს და განხორციელდეს ყველა ის საინვესტიციო პროექტი, რომელიც აქამდე მიმდინარეობდა და მნიშვნელოვანია ამ ინვესტიციების შედეგად შეიქმნას ახალი სამუშაო ადგილები და განვითარდეს რეგიონის ეკონომიკა. ამ ეტაპზე ჩვენ მოგვმართა მხოლოდ ექვსმა ინვესტორმა, თუმცა ამ კუთხით დამატებითი კონსულტაციები მიმდინარეობს სხვადასხვა კომპანიებთან. ჩვენ განვიხილავთ ნებისმიერ შემოთავაზებას ინვესტორების მხრიდან, რადგან მათთან მიმართებაშ უნდა ვიყოთ ძალიან ფაქიზები იმიტომ, რომ ეს საკითხი რეგიონისთვის ერთ-ერთი მნიშვნელოვანი და პრიორიტეტული საკითხია” – განაცხადა აჭარის ფინანსთა და ეკონომიკის მინისტრმა რამაზ ბოლქვაძემ.
