ხვალ, 26 აგვისტოს, სტამბულში, ბოსფორზე მესამე ხიდის გახსნის ცერემონიალს საქართველოს პირველი ვიცე-პრემიერი დიმიტრი ქუმსიშვილი დაესწრება. აღნიშნულის შესახებ ინფორმაციას თურქული გამოცემა Anadolu ავრცელებს. როგორც Anadolu თურქეთის მთავრობის ადმინისტრაციაზე დაყრდნობით იუწყება ცერემონიალს რამდენიმე სახელმწიფოს პრეზიდენტი და პრემიერ-მინისტრი დაესწრება, მათ შორის იქნება საქართველოს პირველი ვიცე-პრემიერიც.
სულთან იავუზის სახელობის ხიდის მშენებლობა, რომელიც ბოსფორის სრუტეზე რიგით მესამე ხიდია, 27 თვეში დასრულდა, ეს იმ ფონზე როდესაც გეგმის თანახმად მშენებლობა 36 თვეში უნდა დასრულებულიყო.
პროექტი თურქეთის მთავრობას 4 მლრდ დოლარამდე დაუჯდა.
თავად ხიდის სიგრძე 2164 მეტრია, სიმაღე - 322 მეტრი, სიგანე - 59 მეტრი და ის უკვე არსებული 2 ხიდის სამხრეთითაა განთავსებული და თურქეთის მეგაპოლისის აზიურ და ევროპულ ნაწილებს აკავშირებს. ხიდზე ავტომობილები სულ 8 ზოლში იმოძრავებენ.
ახალი ხიდი, იმ დიდი პროექტის შემადგენელი ნაწილია, რომელიც ახალი აეროპორტის მშენებლობასაც ითვალისწინებს.
პროექტს უკვე უწოდეს უმნიშვნელოვანესი პროექტი თანამედროვე თურქეთის ისტორიაში.
ბოსფორზე პირველი ხიდი 1973 წელს აშენდა, რომელზედაც ყოველდღიურად 200 ათასი სატრანსპორტო საშუალება გადაადგილდება.
მეორე ხიდის მშენებლობა კი 1988 წელს დასრულდა და მისი საშუალებით ყოველდღიურად 150 ათასი სატრანსპორტო საშუალება სარგებლობს.
