„საერთაშორისო რესპუბლიკურმა ინსტიტუტმა“ (IRI) ოქტომბრის არჩევნებთან დაკავშირებით საქართველოში სადამკვირვებლო მისია გამოგზავნა.
არჩევნების მონიტორინგის მიზნით 14 გრძელვადიანი დამკვირვებელი 10 სხვადასხვა ქვეყნიდან საქართველოში გუშინ ჩამოვიდა. მისიის წარმომადგენლები თბილისში, სასტუმრო „რედისონში“ შეხვედრებს მართავენ.
IRI-ს საქართველოს მისიის ხელმძღვანელი ანდრეა ქერბსი ჟურნალისტებთან აცხადებს, რომ მონიტორინგის არეალია თბილისი, სამეგრელო, აჭარა, გურია, იმერეთი, სამცხე-ჯავახეთი, ქვემო ქართლი, კახეთი, შიდა ქართლი, მცხეთა- მთიანეთი. ისინი შეხვდებიან კანდიდატებს, პოლიტიკურ პარტიებს, არასამთავრობო ორგანიზაციისა და მედიის წარმომადგენლებს. დაესწრებიან შეხვედრებს ამომრჩევლებთან, შეაფასებენ არჩევნების მიმდინარეობას წინასაარჩევნო პერიოდში.
არჩევნების დღისთვის საქართველოში IRI-ს დაახლოებით 30 მოკლევადიანი დამკვირვებელი ჩამოვა, რომლებიც არჩევნების დღეს დააკვირდებიან. ამასთან, საერთაშორისო რესპიბლიკურ ინსტიტუტს ექნება წინასაარჩევნო ორი ანგარიში, არჩევნების შემდეგ კი არჩევნების შეფასების განცხადება და საბოლოო ანგარიში.
