დამოუკიდებლობის დღესთან დაკავშირებით გამართული აღლუმის ფარგლებში ქვეყნის პირველმა პირმა ნუგზარ შარაშიძეს, მირზა კონცელიძეს, ასლან ინაიშვილსა და ალბერტ ხინტილაძეს "საკუთარი სიცოცხლის რისკის ფასად სოფელი ველისციხის განადგურებისგან გადარჩენისთვის" ვახტან გორგასლის პირველი ხარისხის ორდენები გადასცა.
"ეს რაზმი, ეს შენაერთი თავის დროზე საქართველოს ერთიანობის წინააღმდეგ აჯანყებულმა ასლან აბაშიძემ მოამზადა რუსი ინსტრუქტრების მეშვეობით. ამ რაზმს ჰყავს ძალიან კარგი მყვინთავები და ისინი მოამზადეს ქართული სახელმწიფოს წინააღმდეგ დივერსიების მოსაწყობად. ეს არის ის რაზმი, რომელიც 2004 წელს ცენტრალური ხელისუფლების წარმომადგენლებს არ უშვებდა აჭარაში და ყველაფერს აკეთებდა აჭარის ხელისუფლების დასახმარებლად - იმისთვის, რომ საქართველო დარჩენილიყო აჭარის გარეშე. მაგრამ, ეს რაზმი მას შემდეგ ჩადგა საქართველოს სახელმწიფოებრიობის სამსახურში და არ ვიცი, იცინ თუ არა სოფელ ველისციხის მაცხოვრებლებმა, მაგრამ დღეს რომ ეს სოფელი არსებობს, არის ამ ოთხი გმირის და მათი მეგობრების დამსახურება.... ეს არის ნამდვილი ქართული გმირობა და ვაჟკაცობა", - განაცხადა სააკაშვილმა.
