აშშ უკრაინის რადას ახალი მთავრობის დროულად დამტკიცებისკენ მოუწოდებს. განცხადება ამის შესახებ სახელმწიფო დეპარტამენტში გამართულ ბრიფინგზე მარკ ტონერმა გააკეთა.
"ჩვენ გვჯერა, რომ ახალი კაბინეტი მხარს დაუჭერს ქვეყნისთვის საჭირო პოლიტიკურ და ეკონომიკურ რეფორმებს და მსოფლიო სავალუტო ფონდის და ევროკავშირის მიერ გაწეულ რეკომენდაციებს გაითვალისწინებს"– განცხადა მარკ ტონერმა.
უკრაინის პრემიერის გადადგომას გამოეხმაურნენ თეთრ სახლშიც.
“თეთრი სახლის ადმინისტრაცია დიდი ხანია აკვირდება უკრაინაში მიმდინარე მოვლენებს. პრემიერმა იაცენიუკმა მნიშვნელოვანი როლი შეასრულა, მაშინ როდესაც ქვეყანა რთული გამოწვევების წინაშე იდგა. ის შეერთებული შტატებისთვის მნიშვნელოვანი პარტნიორი იყო,” - განაცხადა თეთრი სახლის პრეს მდივანმა, ჯოშ ერნესტმა.
დღეს გავრცელებული ინფორმაციით, უკრაინაში მთავრობის შემადგენლობა შეთანხმებულია მას შემდეგ, რაც წუხელ, გვიან ღამით, უკრაინის უმაღლესი რადას თავმჯდომარე ვლადიმერ გროისმანი პრემიერ-მინისტრობაზე დაითანხმეს.
თავდაპირველად გროისმანი უარს აცხადებდა პრემიერობაზე, რადგან მის მიერ წარდგენილი კანდიდატურები რამდენიმე თანამდებობაზე არ დააკმაყოფილეს. მოლაპარაკებების შედეგად იგი პირველი ვიცე სპიკერის პოსტზე ვიტალი კოვალჩუკის კანდიდატურას დათანხმდა, ამის სანაცვლოდ კი მას მინისტრთა კაბინეტის 5 წევრის დანიშვნის საშუალება ექნება.
რაც შეეხება პრემიერ არსენი იაცენიუკის განცხადებას გადადგომის შესახებ, მას უმაღლესი რადა, სავარაუდოდ, დღეს განიხილავს.
