საქართველოში პირველად, საქართველოს ეკონომიკისა და მდგრადი განვითარების სამინისტროს სსიპ ინოვაციების და ტექნოლოგიების სააგენტოს სამრეწველო ინოვაციების ლაბორატორია მსურველებს უმძლავრეს პლატების შემქმნელ აპარატურას სთავაზობს.
სსიპ ინოვაციების და ტექნოლოგიების სააგენტოს პრესსამსახურის ინფორმაციით, ტექნოპარკში არსებული ფაბლაბში უკვე შესაძლებელია უნიკალური 3 დანადგარით პლატების დამზადება, რაც მოიცავს მასზე ელექტრონული კომპონენტების მონტაჟსა და მირჩილვას, ანუ მცირე ზომის ნაწილაკების მიმაგრებას.
პლატა - ეს არის ელექტრონული ხელსაწყოების უმთავრესი ნაწილი და მათი დამზადება ფაბლაბში უკვე შეუძლია ნებისმიერ დაინტერესებულ ადამიანს, რომელსაც სურს მომავალში საქართველოში აწარმოოს ელექტრონული მოწყობილობები: კომპიუტერი, ლეპტოპი, მობილური ტელეფონი და სხვა.
ტექნოპარკის ფაბლაბი პლატების შესაქმნელად და მათზე ყველა ტიპის თანამედროვე ელექტრონული სისტემის მონტაჟისთვის სამი ტიპის აპარატურას სთავაზობს მომხმარებელს:
1) კალის ავტომატური შაბლონის პრინტერი;
2) პლატაზე კომპონენტების ავტომატური გამანაწილებელი;
3) სარჩილავი ღუმელი.
სამივე აპარატს ასევე გააჩნია საწარმოო სიმძლავრე, შემოწმებისა და კონტროლის ავტომატური სისტემა, უსწრაფესი მონტაჟი, რაც ერთ საათში 6000 დეტალის დასმის შესაძლებლობას ითვალისწინებს.
აღსანიშნავია, რომ პლატების დასამზადებლად საჭირო მაღალტექნოლოგიური აპარატურის სპეციალისტების გადასამზადებლად ფაბლაბში გერმანელი ექსპერტი, ბასტიან ბუიზენი ჩამოვიდა, რომელიც პლატების მბეჭდავი აპარატების მწარმოებელი კომპანიის წარმომადგენელია. ის ფაბლაბის ქართველ სპეციალისტებს 4 დღის განმავლობაში ჩაუტარებს ტრენინგებს და დეტალურად გააცნობს აპარატურის შესაძლებლობებს.
