„მალე ბათუმში ამორტიზირებული ტექნიკის მქონე საავადმყოფოს ნაცვლად ახალი თანამედროვე სტანდარტის სამედიცინო დაწესებულება დაიწყებს ფუნქციონირებას”, აღნიშნულის შესახებ განცხადება აჭარის ფინანსთა და ეკონომიკის მინისტრმა დავით ბალაძემ გააკეთა, რომელიც დღეს პრემიერ-მინისტრთან და აჭარის მთავრობის მეთაურთან ერთად ბათუმში რესპუბლიკური კლინიკური საავადმყოფოს საძირკვლის ჩაყრის ცერემონიას დაესწრო.
როგორც დავით ბალაძემ აღნიშნა, ბიუჯეტიდან საავადმყოფოს მშენებლობისთვის 22 მლნ ლარზე მეტი დაიხარჯება.
„დღეს აჭარაში კიდევ ერთ მნიშვნელოვან პროექტს ჩაეყარა საფუძველი. მალე ბათუმში ამორტიზირებული ტექნიკის მქონე საავადმყოფოს ნაცვლად ახალი თანამედროვე სტანდარტის სამედიცინო დაწესებულება დაიწყებს ფუნქციონირებას. ყველას კარგად გვახსოვს ბოლო 20 წელია ეს შენობა რა მდგომარეობაში იყო და რა სირთულეს უქმნიდა მოსახლეობას. აჭარის ფინანსთა და ეკონომიკის სამინისტროს ბიუჯეტიდან რესპუბლიკური კლინიკური საავადმყოფოს მშენებლობისთვის 22 მლნ ლარზე მეტი დაიხარჯება. მიხარია,რომ დავიწყეთ პროექტი, რომელიც რეგიონის მოსახლეობის კეთილდღეობისთვის კეთდება და სწორედ მათ გაუადვილებს სამედიცინო მომსახურების მიღებას. აქ მომუშავე პროფესიონალები განახლებული ტექნიკური ბაზით გაცილებით ხარისხიან სერვისებს შესთავაზებენ მოსახლეობას. მინდა წარმატებები ვუსურვო კომპანიას პროექტის განხორციელებაში”,- განაცხადა აჭარის ფინანსთა და ეკონომიკის მინისტრმა.
დავით ბალაძის განმარტებითვე, მშენებლობის მონიტორინგს სამინისტროს შპს „სტადიონი“ უწევს.
„2 წელში დასრულდება მშენებლობა და ბათუმს კიდევ ერთი თანამედროვე ტიპის ინფრასტრუქტურული ობიექტი შეემატება”, განაცხადა ბალაძემ.
ახალი მრავალპროფილური საავადმყოფო 170 საწოლზე იქნება გათვლილი. სამედიცინო დაწესებულება თანამედროვე ტექნიკით და ინვენტარით იქნება აღჭურვილი და პაციენტებს მაღალი ხარისხის მომსახურებას შესთავაზებს. ტერიტორიაზე ორი 5 სართულიანი და ერთი 4 სართულიანი ბლოკი აშენდება. ცენტრალური შესასვლელი აბუსერიძისა და გრიბოედოვის ქუჩების კუთხეში მოეწყობა. სამშენებლო მოედანი ქ. ბათუმში ტბელ აბუსერიძის ქ. 2-ში მდებარეობს. ტერიტორიის ფართი 22107მ2 შეადგენს. ამ ეტაპზე მიმდინარეობს ფუძის მოწობის სამუშაოები. მშენებლობაზე 30 ადამიანია დასაქმებული. ეს ციფრი სამომავლოდ 60-მდე გაიზრდება. მრავალფუნქციური საავადმყოფოს მშენებლობა 2018 წლის გაზაფხულზე დასრულდება.
შეგახსენებთ, რომ ბათუმში რესპუბლიკური საავადმყოფო 1964 წელს აშენდა. მისი მატერიალურ-ტექნიკური ბაზა დაახლოებით ბოლო 20 წელია ამორტიზირებულია.
