USAID-ის მისიის დირექტორმა, დაგლას ბოლმა საქართველოს რეგიონული განვითარებისა და ინფრასტრუქტურის სამინისტროსთან არსებული, მყარი ნარჩენების მართვის კომპანიის დირექტორს, გიორგი შუხოშვილს ნაგავსაყრელებიდან სათბურის აირების გამზომი მოწყობილოა გადასცა. აღნიშნული მოწყობილობა, რომლის მსგავსიც საქართველოს დღემდე არ გააჩნდა, საქართველოს რეგიონული განვითარებისა და ინფრასტრუქტურის სამინისტროს თხოვნით იქნა შეძენილი.
ევროკავშირთან ასოცირებისა და კლიმატის ცვლილების შესახებ პარიზის ხელშეკრულების თანახმად, საქართველომ აიღო ვალდებულება შეაფასოს და შეამციროს მეთანისა და სხვა სათბურის აირების ემისიები, რომლებსაც წვლილი შეაქვთ კლიმატის გლობალურ ცვლილებაში. დღემდე, საქართველოს არ ჰქონდა შესაბამისი მოწყობილობა და ტექნიკური ცოდნა, რათა ეს ვალდებულებები შეესრულებინა. USAID-ის მიერ დაფინანსებული პროგრამა „ნარჩენების მართვის ტექნოლოგიები რეგიონებში“ (WMTR) ამ მოწყობილობას საქართველოს მყარი ნარჩენების მართვის კომპანიას საჩუქრად გადასცემს და კომპანიის შესაბამის თანამშრომლებს ჩაუტარებს ტრენინგს მოწყობილობის გამოყენებაზე.
ღონისძიების ფარგლებში, WMTR პროგრამასა და საქართველოს მყარი ნარჩენების მართვის კომპანიას შორის ხელი მოეწერა ურთიერთთანამშრომლობის მემორანდუმს. ღონისძიების დროს რუსთავის ნაგავსაყრელზე გაიზომა სათბურის აირები. მემორანდუმის ფარგლებში, შეფასდება სათბურის აირები და მომზადდება საბაზო ინფორმაცია სათბურის აირების გამოყოფით გარემოზე გამოწვეული ზიანის შემცირების სამოქმედო გეგმასთან ერთად. საბაზო ინფორმაცია გამოყენებული იქნება ნაგავსაყრელის დახურვისა და მოვლის გეგმების შესამუშვებლად.
USAID-ის მიერ დაფინანსებული WMTR პროგრამა, რომელსაც International City/County Management Association (ICMA) კავკასიის გარემოსდაცვითი არასამთავრობო ორგანიზაციების ქსელთან ერთად (CENN) ახორციელებს, 2014 წლიდან აქტიურად მუშაობს ნარჩენების მდგრადი მართვის პრაქტიკის დანერგვაზე საქართველოს ორ რეგიონში - კახეთისა და აჭარაში. პროექტი აქტიურად თანამშრომლობს ყველა სამთავრობო უწყებასთან სუფთა და ჯანსაღი გარემოს შექმნისა და ადამიანის ჯანმრთელობისა და ბუნებრივ რესურსებზე ნარჩენებით გამოწვეული უარყოფითი ზემოქმედების შემცირების მიზნით.
