10 მარტს ვენაში ქართული არქიტექტურის გამოფენა გაიხსნება. „კონტინენტების გადაკვეთაზე" - ასე ჰქვია ექსპოზიციას რომელსაც ვენის სადაზღვევო ჯგუფი 10 მარტს გამართავს.
საქართველო ერთ-ერთია იმ 24 ქვეყნიდან სადაც ვენის სადაზღვევო ჯგუფია წარმოდგენილი.
ვენის სადაზღვევო ჯგუფი პარტნიორი ქვეყნების მხარდასაჭერად კულტურულ და სოციალურ პროექტებს აქტიურად ახორციელებს, საქართველოს არქიტექტურული მემკვიდრეობის გამოფენაც ერთ-ერთი მათგანია.
გამოფენას "ვენის სადაზღვევო ჯგუფისა" და "ჯიპიაი ჰოდლინგის" ხელმძღვანელი პირები გახსნიან. გახნას ასევე დაესწრებიან საქართველოს მთავრობისა და დიპლომატიური კორპუსის წარმომადგენლები. ექსპოზიცია ვენაში 10 მარტიდან 27 აპრილამდე გაგრძელდება.
საპრეზენტაციო მასალიდან:
“ვენის სადაზღვევო ჯგუფი” წარმოგიდგენთ საქართველოს არქიტექტურული მემკვიდრეობის გამოფენას სახელწოდებით „კონტინენტების გადაკვეთაზე“. ექსპოზიციაზე აქცენტი თბილისზე კეთდება, მის მრავალფეროვან არქიტექტურულ ლანდშაფტზე და ისტორიაზე მე-19 საუკუნის ბოლოდან დღემდე. დედაქალაქის დღევანდელ იერსახეს ევროპული არქიტექტურის გავლენით აგებული მე-19 საუკუნის შენობები, მე-20 საუკუნის საბჭოთა არქიტექტურის ნიმუშები და მრავალი საერთაშორისოდ აღიარებული ნაგებობა ქმნის. ეს უნიკალური არქიტექტურული ნიმუშები ექსპოზიციის ყურადღების ცენტრშია. გამოფენა ასევე აერთიანებს სხვადასხვა ტენდენციას, რომელიც ხრუშოვის ეპოქის დასრულების შემდეგ გამოიკვეთა. საქართველოში არქიტექტურის განვითარება ემთხვევა მე-19 საუკუნის ბოლოს და შესაბამისად, ეროვნული იდენტობის, კულტურული და ლინგვისტური ავტონომიის ჩამოყალიბების პროცესს. ამ პერიოდში აშენდა ადმინისტრაციული, კულტურული და საგანმანათლებლო დანიშნულების არაერთი შენობა. გამოფენაზე წარმოდგენილი იქნება არქიტექტურული განვითარების რამდენიმე ეტაპის 60 ნიმუში დიდი ფორმატის ფოტოების სახით.
დარბაზის კედლებზე განთავსებული იქნება ძველი თბილისის სცენები, რომ დამთვალიერებელმა უკეთ გაიაზროს ისტორიული კონტექსტი. გამოფენის ატმოსფეროს შექმნის ცენტრალურ ადგილას დამონტაჟდებული თანამედროვე ქალაქის ამსახველი ინსტალაცია - როგორც მთლიანი პრეზენტაციის გამაერთიანებელი ობიექტი.
საგამოფენო დარბაზში წარმოდგენილი იქნება დიდი ზომის მოდელები და სამგანზომილებიანი ობიექტები, სხვადასხვა ისტორიული დოკუმენტების ორიგინალები: რუქები, ფოტოები, არქიტექტურული ჩანახატები, ბარათები, წიგნები და ჟურნალები.
დამთვალიერებელს საშუალება ექნება გაეცნოს გამოფენის კატალოგს, სრული ფოტომასალით და ინფორმაციით.
