შეშფოთებასა და კრიტიკულ შეფასებებს იწვევს ევროკავშირისა და თურქეთის წინასწარი გეგმა მიგრაციის კრიზისის მოსაგვარებლად. ამის შესახებ ,,რადიო თავისუფლება“ იტყობინება. კერძოდ, კრიტიკა მიმართულია, მაგალითად, ევროკავშირიდან თურქეთში მიგრანტების მასობრივად დაბრუნების პერსპექტივის წინააღმდეგ.
გაეროს ლტოლვილთა სააგენტოს განმარტებით, საერთაშორისო სამართლით, დაუშვებელია უცხოელების მასობრივი გაძევება. ამასთან, სააგენტოს ევროპის ბიუროს დირექტორი, ვენსან კოშეტელი აღნიშნავს, რომ საბერძნეთში ჩასული მიგრანტების 91%-ს შეადგენს ხალხი, რომელიც გაურბის ომებს, მაგალითად, ერაყში, სირიასა და ავღანეთში.
უფლებადამცველი ორგანიზაცია „ამნესტი ინტერნეიშნალიც“ აკრიტიკებს ევროკავშირისა და თურქეთის წინასწარ გეგმას, რომელზეც მათ ბრიუსელში 7 მარტს გამართულ სამიტზე მოილაპარაკეს.
,,ევროკავშირისა და თურქეთის ლიდერები, ფაქტობრივად, ვაჭრობენ და ანგარიშს არ უწევენ იმ ადამიანების უფლებებსა და ღირსებას, რომლებიც მსოფლიოში ყველაზე დაუცველ ხალხს მიეკუთვნებიანო, - აღნიშნავს ბრიუსელში „ამნესტის“ ოფისის ხელმძღვანელი, ივერნა მაკგოუანი.
ევროკავშირისა და თურქეთის ლიდერები 7 მარტს, შეთანხმდნენ წინასწარი მოქმედების გეგმაზე, რომელიც ევროპაში მიგრანტების ნაკადის შეზღუდვას ითვალისწინებს. ევროსაბჭოს პრეზიდენტმა დონალდ ტუსკმა მიღწეული შეთანხმების გამო კმაყოფილება გამოთქვა.
