ენერგეტიკის მინისტრმა, კახა კალაძემ მთავრობის ადმინისტრაციაში „სოკართან“ ხელშეკრულების გაფორმების შემდეგ გამართულ პრესკონფერენციაზე განაცხადა, რომ „გაზპრომიდან“ ბუნებრივი აირის დამატებითი მოცულობის საჭიროება არ არსებობს.
„გაზპრომთან“ დაკავშირებით მოლაპარაკებები ჯერ არ დასრულებულა, ხელშეკრულება ჯერ გაფორმებული არ არის. ჩვენ რამდენიმე ხნის წინ გადავუგზავნეთ ჩვენი ბოლო შეთავაზება, რომელიც ქართული მხრისგან იქნა გაჟღერებული, ეს არის დავრჩეთ ისევ იმ ძველ, კონტრაქტის პირობებში, ანუ ისევ 10% მივიღოთ ნედლეულის სახით ბუნებრივი აირი.
დამატებითი მოცულობები ამ ეტაპზე საჭიროებას არ წარმოადგენს. საქართველო მომავალი წლების განმავლობაში იქნება უზრუნველყოფილი ბუნებრივი აირით“, - განაცხადა კალაძემ.
საქართველოს მთავრობასა და კომპანია „სოკარს“ შორის ხელშეკრულებათა პაკეტს მოეწერა ხელი, რომლის თანახმად, საქართველო დამატებით 500 მილიონ კუბურ მეტრ ბუნებრივ აირს მიიღებს. ამასთან, „სოკარმა“ გამოთქვა მზადყოფნა, 1000 კუბ.მ-ზე 35-40 აშშ დოლარით შეამციროს გაზგასამართი სადგურებისთვის კომერციული გაზის ფასი.
