ენერგეტიკის მინისტრი კახი კალაძე ენერგეტიკის სფეროს პროექტების დაჩქარებაზე საუბრობს. "საქართველოს ენერგეტიკოსების" მეორე გამოცემის პრეზენტაციაზე მან განაცხადა, რომ საქართველოს აქვს შესაძლებლობა გახდეს ელექტროენერგიის ექსპორტიორი ქვეყანა.
მისივე თქმით, ბოლო 3 წლის განმავლობაში ბევრი მნიშვნელოვანი პროექტი განხორციელდა და სამომავლოდ, ასევე, მრავალი პროექტის განხორციელებაა დაგეგმილი.
"ეს ყველაფერი კეთდება ერთი მარტივი მიზეზის გამო, რომ რაც შეიძლება სწრაფად მოვახერხოთ და საქართველო გახდეს ელექტროენერგიის თვალსაზრისით დამოუკიდებელი ქვეყანა, რომ არ ვიყოთ დამოკიდებული, როგორც დღეს ჩვენს მეზობელ ქვეყნებზე. ზამთრის პერიოდში, როცა ყველაზე მეტია ელექტროენერგიის მოხმარება, ჩვენ მისი მეზობელი ქვეყნებიდან შემოტანა გვიწევს. რაც მთავარია, ეს ყველაფერი აისახება თითოეული ჩვენგანის ჯიბეზე, რადგან მეტი ტარიფის გადახდა გვიწევს", - განაცხადა კალაძემ.
როგორც ენერგეტიკის მინისტრმა აღნიშნა, ყველაფერი უნდა გაკეთდეს რაც შეიძლება სწრაფად იმისთვის, რომ საქართველოს ჰქონდეს შიდა მოხმარებისთვის საკმარისი ელექტროენერგია.
"ასევე გვაქვს შესაძლებლობა გავხდეთ ექსპორტიორი ქვეყანა. საქართველოში წარმოებული ელექტროენერგიის გატანა მოვახერხოთ თურქეთში, თურქეთის გავლით ევროპულ ქვეყნებში", - აღნიშნა ენერგეტიკის მინისტრმა.
