ირანთან სავიზო რეჟიმის გაუქმების შემდეგ ტურისტების ზრდას ელიან აჭარაშიც. აჭარის ტურიზმის დეპარტამენტის თავმჯდომარე მამუკა ბერძენიშვილი არ გამორიცხავს, რომ სამომავლოდ ირანში რეგიონის ტურისტული პოტენციალის პოპულარიზაციის მიზნით სხვადასხვა აქტიობები დაიგეგმოს.
„მინდა ავღნიშნო, რომ ირანთან სავიზო რეჟიმის გაუქმება ერთმნიშვნელოვნად დადებითი ფაქტია. ეს პირველ რიგში ხელს შეუწყობს ჩვენს ქვეყანაში და მით უფრო აჭარაში ირანელი ტურისტების მატებას.
სამწუხაროდ, ბოლო წლებში ამ მხრივ კლებადი სტატისტიკა გვქონდა, რაც ვფიქრობ ვიზალიბერალიზაციის შემდეგ გამოსწორდება.
2011 წელს, რეგიონის ტურისტული პოტენციალის პოპულარიზაციის მიზნით, ჩვენ მონაწილეობას ვღებულობდით ირანში საერთაშორისო ტურისტულ გამოფენაში და აჭარის დელეგაციაც იმყოფებოდა ირანში საქმიანი ვიზიტებით. სამომავლოდ არ გამოვრიცხავ, რომ ჩვენ ისევ დავგეგმოთ აქტივობები ირანში რეგიონის ტურისტული პოტენციალის პოპულარიზაციის მიზნით და დავიწყოთ ზრუნვა ამ ტურისტული ბაზრის ათვისებაზეც“, განაცხადა მამუკა ბერძენიშვილმა.
აჭარის ტურიზმის დეპარტამენტში, განთავსების ობიექტების მიერ მოწოდებულ სტატისტიკაზე დაყრდნობით, განმარტავენ, რომ 2015 წელს ირანიდან აჭარაში 1 828 ვიზიტორი იმყოფებოდა, 2014 წელს კი - 9 514 ვიზიტორი. შესაბამისად 2015 წელს, 2014 წელთან შედარებით, აჭარაში განთავსების ობიექტებში ირანელ ვიზიტორთა რაოდენობა 81 %-ით შემცირდა. 2013 წლის მონაცემებით, აჭარის განთავსების ობიექტების მომსახურებით 18 559 ირანელმა ვიზიტორმა ისარგებლა, შესაბამისად 2014 წელს 2013 წელთან შედარებით ირანელ ტურისტთა მაჩვენებელი 49 %-ითა შემცირებული.
შეგახსენებთ, რომ ქართული მხარის ინიციატივით, სატელეფონო საუბარი შედგა საქართველოს პრემიერ-მინისტრსა და ირანის ისლამური რესპუბლიკის პრეზიდენტს შორის. გიორგი კვირიკაშვილმა და ჰასან რუჰანიმ ისაუბრეს ქართველი და ირანელი ხალხის მჭიდრო კულტურულ ურთიერთობებზე.
საუბრისას გამოითქვა ტურიზმის სფეროში თანამშრომლობის გაღრმავების იმედი. აღინიშნა, რომ ამ მიმართულებით ქართული მხარე გადადგამს კონკრეტულ ნაბიჯს, რაც ირანთან სავიზო რეჟიმის გაუქმებაში გამოიხატება.
