ამ წუთებში აჭარის მთავრობის სხდომა მიმდინარეობს. მთავრობის წევრები დღის წესრიგით გათვალისწინებულ 11 საკითხს განიხილავენ. აჭარის ფინანსთა და ეკონომიკის მინისტრი დავით ბალაძე ადგილობრივ თვითმმართველ ერთეულებზე გადასაცემი კაპიტალური ტრანსფერის ფარგლებში განსახორციელებელი კაპიტალური პროექტების დამტკიცების თაობაზე, ასევე შპს „ბათმშენი-2007“-ის მიმართ საინვესტიციო საქმიანობის ხელშეწყობის კუთხით რიგი ღონისძიებების განხორციელების შესახებ მოხსენებით წარსდგა.
მინისტრმა სხდომაზე ძველ ბათუმში ინფრასტრუქტურული სამუშაოების მიმდინარეობაზე ისაუბრა. რეგიონის ჯანმრთელობისა და სოციალური დაცვის მინისტრი ნუგზარ სურმანიძე აჭარის ავტონომიური რესპუბლიკის ადმინისტრაციულ საზღვრებში დაზარალებული ეკომიგრანტი ოჯახების უსაფრთხო საცხოვრისით უზრუნველყოფის წესს წარადგენს.
მთავრობის სხდომაზე განათლების მინისტრი გიორგი თავამაიშვილი აჭარის ავტონომიური რესპუბლიკის რესპუბლიკური ბიუჯეტიდან სპორტის სფეროში ღონისძიებების დაფინანსების ერთიანი ნორმების, თანხის გამოყოფისა და ხარჯვის ანგარიშგების დამტკიცების შესახებ 2010 წლის 7 დეკემბრის N49 დადგენილებაში ცვლილების შეტანის თაობაზე ისაუბრებს; სხდომაზე მოხსენებით წარსდგებიან აჭარის გარემოს დაცვისა და ბუნებრივი რესურსების მართვის დეპარტამენტის ხელმძღვანელი ვახტანგ წულაძე, ტურიზმისა და კურორტების დეპარტამენტის ხელმძღვანელი მამია ბერძენიშვილი და აჭარის საავტომობილო გზებისა და სამელიორაციო სისტემების მართვის დეპარტამენტის უფროსი გიორგი რომანაძე.
