ფინანსთა მინისტრი ნოდარ ხადური ჩინეთის სახალხო რესპუბლიკის ექსპორტ-იმპორტის (ექსიმბანკის) რეგიონალურ პრეზიდენტს, იან ჩუანჯინს შეხვდა, რომელიც საქართველოში სამუშაო ვიზიტით იმყოფება.
როგორც ბანკის რეგიონალურმა პრეზიდენტმა განაცხადა, საქართველო ჩინეთისთვის მნიშვნელოვანი და სტრატეგიული ქვეყანაა, სწორედ ამიტომ თბილისში დაგეგმილი შეხვედრების მიზანია, ქვეყნის ეკონომიკაში მიმდინარე პროცესებისა და საინვესტიციო შესაძლებლობების გაცნობა.
ფინანასთა მინისტრმა სტუმარს მიაწოდა ინფორმაცია ჩინეთში მისი ვიზიტისა და იმ შეხვედრების შესახებ, რომელიც გაიმართა ჩინეთის პრეზიდენტთან, პრემიერ-მინისტრთან, ფინანსთა მინისტრთან და აზიის ინფრასტრუქტურის საინვესტიციო ბანკის პრეზიდენტთან.
ფინანსთა მინისტრის, ნოდარ ხადურის თქმით, საქართველოსთვის მნიშვნელოვანია ინვესტიციებისთვის დამატებითი ფინანსური რესურსების მოზიდვა და ქვეყნისთვის პრიორიტეტული სფეროების, განსაკუთრებით, ინფრასტრუქტურული პროექტების დაფინანსება.
როგორც მინისტრმა აღნიშნა, ქართული მხარე მზადაა, დარგობრივ სამინისტროებთან ერთად მოისმინოს და განიხილოს ბანკის მიერ წარმოდგენილი წინადადებები.
