საქართველოს ეკონომიკისა და მდგრადი განვითარების სამინისტროს სსიპ ინოვაციებისა და ტექნოლოგიების სააგენტომ ახალი საკანონმდებლო პაკეტი შეიმუშავა, რომელიც საქართველოში ინოვაციებისა და ტექნოლოგიების განვითარებას უწყობს ხელს. კანონპროექტები ასევე მოიცავს სამართლებრივი გარანტიების უზრუნველყოფას, რომელიც აღნიშნული სფეროს განვითარებისათვის უმნიშვნელოვანესია და პირდაპირ აისახება ქვეყნის ეკონომიკურ წინსვლაზე. კანონპროექტის განხილვა დღეს, 20 იანვარს, ტექნოპარკში მიმდინარეობს. საჯარო განხილვას ესწრებიან საჯარო, კერძო და არასამთავრობო სექტორის წარმომადგენლები.
როგორც „ჯი-ეიჩ-ენს“ სააგენტოდან აცნობეს, ინოვაციების მარეგულირებელი პირველი სამართლებრივი ჩარჩო დოკუმენტი განსაზღვრავს ერთის მხრივ ინოვაციების კანონისმიერ განმარტებას და მეორე მხრივ ინოვაციური საქმიანობის სუბიექტების ძირითად უფლებებს. საყურადღებოა, საქართველოში რეგისტრირებულ მეწარმე სუბიექტებზე ინოვაციური საქმიანობის განსახორციელებლად სახელმწიფო გრანტის გაცემის უფლებამოსილების დანერგვა, რაც მეტ სტიმულს მისცემს ინოვაციური იდეების მქონე ადამიანებს და მათ იდეებს აქცევს რეალობად. ხშირად მსგავსი ინიციატივები სტარტაპერებისათვის არის მათი მიზნის მიღწევის უალტერნატივო გზა, რაშიც მომავალში სახელმწიფო კიდევ უფრო აქტიურ მონაწილეობას მიიღებს და დაეხმატრები კონკურენტუნარიანობის ასამაღლებლად გლობალური მასშტაბით. მეწარმე სუბიექტები მიღებული გრანტის ფარგლებში ასევე გათავისუფლდებიან მოგების გადასახადისაგან, რაც მათ საქმიანობას კიდევ უფრო გაამარტივებს და მეტ შანსს მისცემს სრულყონ ახალი წამოწყებები.
კანონის დონეზე მოხდება გამომგონებლის უფლების დაცვა კომერციალიზაციის პროცესში, რაც აუცილებელია თანამედროვე საზოგადოებისთვის და იმ ადამიანებისთვის, რომლებიც ამ სფეროში აქტიურად არიან ჩართულნი. კანონპროექტი განსაზღვრავს სახელმწიფო დაფინანსების შედეგად მიღებული კომერციალიზაციიდან გამომგონებლის გარანტირებულ მინიმალურ წილს.
ქვეყნისათვის მნიშვნელოვანია გამოგონებების კომერციალიზაცია, რასაც მომავალში სახელწიფო აუცილებლად შეუწყობს ხელს და შემოიტანს საჯარო ინტერესის გამოყენების კანონისმიერ მექანიზმს, რათა მაქსიმალურად იქნეს გამოყენებული ქართული სამეცნიერო პოტენციალი ქვეყნის ეკონომიკის განსავითარებლად.
ინოვაციებისა და ტექნოლოგიების სააგენტო ეკონომიკისა და მდგრადი განვითარების სამინისტროსთან ერთად მაქსიმალურად ცდილობს ხელი შეუწყოს ინოვატორებს, გამომგონებლებსა და სტარტაპერებს და შექმნას ქვეყანაში მათ განვითარებაზე ორიენტირებული ეკოსისტემა.
