სსიპ ქალაქ თბილისის მუნიციპალიტეტის არქიტექტურის სამსახურმა 2015 წლის ანგარიში წარადგინა. სამსახურის უფროსმა, დიმიტრი მოსულიშვილმა თბილისის მერს, დავით ნარმანიასა და დარგის სპეციალისტებს ერთი წლის განმავლობაში შესრულებული სამუშაოები და ის მნიშვნელოვანი პროექტები გააცნო, რომლებიც გასულ წელს განხორციელდა.
„მნიშვნელოვანია , რომ ქალაქ თბილისის მერიის წლიური ანგარიშის შემდეგ, ყველა სამსახური წარმოადგენს 2015 წლის განმავლობაში გაწეული საქმიანობის ანგარიშს. რაც შეფასდება პროფესიული წრეების წარმომადგენლების მიერ, ასევე, ინფორმაცია მიეწოდება საზოგადოებას. ვიმსჯელებთ საქმიანობის ეფექტიანობის გაუმჯობესებასთან დაკავშირებულ საკითხებზე ყველა სამსახურთან მიმართებაში, ასე რომ, ეს პროცესი მაქსიმალურად ღიად და გამჭვირვალედ წარიმართება. ყველაზე მთავარი, რაც ჩვენ 2015 წელს გავაკეთეთ, იყო ის, რომ გამოვაცხადეთ კონკურსი მიწათსარგებლობის გენერალურ გეგმაზე, და კონკურსში გამარჯვებული კონსორციუმი უკვე ძალიან აქტიურად მუშაობს გენერალური გეგმის მომზადებაზე, მეორე საკითხი იყო ის, რომ დაზუსტდა და გამარტივდა ცალკეული პროცედურული საკითხები. 2015 წლის განმავლობაში ჩვენ მაქსიმალურად ვეცადეთ, რომ ერთის მხრივ, საზოგადოებრივი და მეორეს მხრივ, კერძო ინტერესები დაგვებალანსებინა და გაგვეთვალისწინებინა ისე, რომ ქალაქმა შეძლოს განვითარება, იყოს უფრო მეტად მოწესრიგებული“ - განაცხადა დავით ნარმანიამ.
ანგარიშში ყურადღება იყო გამახვილებული ურბანული დაგეგმარების მიმართულებაზე, მათ შორის, დედაქალაქის მიწათსარგებლობის გენერალურ გეგმაზე.
,,მნიშვნელოვანია, რომ სამ თვეში ერთხელ არქიტექტურის სამსახური გეგმის სამუშაო პროცესის მონიტორინგს ახორციელებს.
პრეზენტაციაზე 2015 წელს სამსახურის მიერ შემუშავებული კონცეფციები და პროექტები, ასევე, კონკურსის წესით შერჩეული წინადადებები იყო წარმოდგენილი, მათ შორის : ვარკეთილის მესამე მასივში, ე.წ. „ხრუშჩოვკების“, 700 000 კვ.მ. ტერიტორიის სრული რეკონსტრუქცია/განახლებისთვის მოსამზადებელი სამუშაოები და დაგეგმარება, ბელიაშვილისა და ფეიქრების ქუჩებს შორის მდ.მტკვრის 2კმ.-იან ზოლში, 50 ჰექტარ ტერიტორიაზე სარეკრეაციო ზონის კონცეფცია, ქალაქში ეკოლოგიური მდგომარეობის გაუმჯობესების მიზნით, ველო ქსელის განვითარება, სკვერებისა და სარეკრეაციო ზონების სარეაბილიტაციო პროექტები.
დედაქალაქის იმ ტერიტორიებზე, სადაც ბოლო, 7-8 წლის განმავლობაში აქტიურად მიმდინარეობდა ქაოტური განაშენიანების პროცესი, არქიტექტურის სამსახურმა, მოსახლეობის ინტერესების გათვალისწინებითა და ქალაქმშენებლობითი მიზნებიდან გამომდინარე, კონკურსები გამოაცხადა. შესაბამისად, აღნიშნულ ტერიტორიებზე მოწესრიგებული ინფრასტრუქტურა და საცხოვრებელი გარემო ჩამოყალიბდება. ეს ტერიტორიებია : თბილისის ზღვის მიმდებარედ ვარკეთილის მეურნეობის არეალი, გმირ კურსანტთა, ქერჩისა და თიანეთის ქუჩების ტერიტორია, მდ. ვერეს ხეობა და ა.შ.
აღსანიშნავია, რომ არქიტექტურის სამსახური მონაწილეობს საერთაშორისო პროექტებში. 2015 წელს სამსახურმა პროექტ „მომავლის ქალაქში“ (Morgenstadt) გაიმარჯვა, რომლის ფარგლებშიც, თბილისისათვის მდგრადი განვითარების პროფილი დაიწერება. პროექტი ევროპის წამყვან კვლევით ინსტიტუტ - „ფრაუნჰოფერთან“ ერთად ხორციელდება.
ამასთან, პრეზენტაციაზე ყურადღება გამახვილებული იყო სანებართვო მიმართულებით განხორციელებულ სამუშაოებზე და იმ მნიშვნელოვან პროექტებზე, რომლებიც 2015 წელს იქნა შეთანხმებული. ანგარიში, ასევე, მოიცავდა სამსახურის მიერ იურიდიული მიმართულებით განხორციელებულ სიახლეებს. 2015 წელს ინტენსიურად მიმდინარეობდა მუშაობა თბილისის ტერიტორიების გამოყენებისა და განაშენიანების რეგულირების წესების განახლების მიმართულებით. აღნიშნული პროექტი ითვალისწინებს მიწის ნაკვეთის საზღვრებში ავტოსადგომების მინიმალური რაოდენობის მოთხოვნის განსაზღვრას, განაშენიანების ესთეტიკური პარამეტრების რეგულირებას, განსაკუთრებით კი, ტურისტულ ზონებში და სხვ.
მერიის ინფორმაციით, აღსანიშნავია, რომ სამსახურმა აქტიური მონაწილეობა მიიღო „ადგილობრივი მოსაკრებლის შესახებ“ საქართველოს კანონში განხორციელებულ ცვლილებებში. შედეგად, სამშენებლო ბიზნესი ჯამში 17 500 265 ლარის გადახდის ვალდებულებისგან გათავისუფლდა.
2015 წელს არქიტექტურის სამსახურის საკონსულტაციო ჯგუფის მიერ მომსახურება გაეწია 157,828 მოქალაქეს.
ამასთან, წლის განმავლობაში სამსახური აქტიურად მუშაობდა საახალწლო ილუმინაციების ახალი დიზაინის პროექტის შექმნაზე. შედეგად, ამერიკული ტელე არხის, CNN-ის მიერ გამოქვეყნებულ -მსოფლიოს 16 საუკეთესო გარე-განათებას შორის, წელს, ერთ-ერთი, სწორედ, თბილისი იყო“, - აცხადებენ თბილისის მერიაში.
