საქართველოს პრემიერ-მინისტრმა გიორგი კვირიკაშვილმა ბიზნესმენებს მთავრობის მუშაობის მიმართულებები გააცნო.
მთავრობის ადმინისტრაციაში ბიზნესსექტორთან საუბრისას პრემიერმა განაცხადა, რომ მთავრობამ ქვეყნის ეკონომიკური განვითარებისთვის 4 უმთავრესი მიმართულება გამოყო. მისი განმარტებით, პირველია სამუშაო ადგილების შექმნა და ეკონომიკური განვითარების ხელშეწყობა.
,,ამ კუთხით გასატარებელი რეფორმები შეგვიძლია რამდენიმე ძირითადი ქვეპუნქტით შემოვფარგლოთ. ეს არის უპირველეს ყოვლისა, საგადასახადო რეფორმა, რომელსაც თან ახლავს, როგორც საკანონმდებლო, ასევე ადმინისტრაციული ნაწილი. მხედველობაში მაქვს მხოლოდ და მხოლოდ განაწილებული მოგების დაბეგვრა, მოგების გადასახადისგან გათავისუფლება. ეს არის საგადასახდო რეფორმის ესტონური მოდელი. ასევე ეს არის მაქსიმალურად რეგლამენტირება საგადასახადო ადმინისტრაციული ორგანოების და მათი მუშაობის იმისთვის, რომ დროში შემოფარგული იყოს თითოეული შემოწმება. ძალიან მნიშვნელოვანია ასევე ეკონომიკური დანაშაულის დეკრიმინალიზაცია იმისთვის, რომ მაქსიმალურად ავირიდოთ პატიმრობები, როდესაც საქმე ეხება ეკონომიკურ დანაშაულს. გარდა ამისა, აუცილებელია ფინანსური პოლიციის მოქმედების მაქსიმალური რეგლამენტაცია. მთლიანობაში ამასთან დაკავშირებით გვინდა, რომ თქვენი მოსაზრებები მოვისმინოთ. ეკონომიკური გუნდი მუშაობს დამწყები ბიზნესის განვითარების ხელშეწყობასა და სტარტაპის დაფინანსების მექანიზმის შექმნაზეც’’, - აღნიშნა გიორგი კვირიკაშვილმა.
მისივე თქმით, არსებობს რეფორმის მეორე ბლოკიც, რომელიც გულისხმობს მთავრობის გადაწყვეტილებების მიღების პროცესში ბიზნესის წარმომადგენელთა მაქსიმალურ ჩართულობას.
რაც შეეხება რეფორმის მესამე ბლოკს, რომელიც აღნიშნული პროცესის ქვაკუთხედი უნდა იყოს, კვირიკაშვილის განმარტებით, იგულისხმობს რეგიონების განვითარებას. მისი შეფასებით, რეგიონებში ადამიანებს არანაირი შეგრძნება არ აქვთ, რომ რაიმე კუთხით გადაწყვეტილებების მიღების პროცესში მონაწილეობენ.
პრემიერის ინფორმაციით, რეფორმის მეოთხე ნაწილი საგანმანათლებლო სისტემას უკავშირდება.
,,სამ უმთავრეს მიმართულებას გამოვყოფ. უპირველეს ყოვლისა ეს არის პროფესიული განათლების განვითარება და პროფესიული განათლების პრესტიჟის ამაღლება ქვეყანაში. მეორე - ზოგადი განათლების რეფორმაა, რათა მაქსიმალურად ავწიოთ ზოგადსაგანმანათლებლო სკოლებში განათლების ხარისხი, ხოლო მესამე ეს გახლავთ უმაღლესი განათლების ძალიან მნიშვნელოვანი ფუნდამენტური რეფორმა” , - განაცხადა პრემიერმა და დასძინა, რომ განათლების სისტემამ პოტენციური უმუშევრები არ უნდა წარმოქმნას.
