პრემიერ-მინისტრის გიორგი კვირიკაშვილის განცხადებით, ტექნოლოგიური პარკი არის პირდაპირი ინვესტიცია საქართველოს მომავალში. ამის შესახებ პრემიერმა ოქროყანაში განაცხადა, სადაც მთავრობის წარმომადგენლებტან ერთად, პირველი ტექნოლოგიური პარკი გაიხსნა.
,,ვფიქრობ, რომ ეს არის მართლაც რევოლუციური პროექტი. ეს არის 5 მილიონიანი პროექტი, რომელიც ერთ წელიწადში დაიწყო და დამთავრდა. ეს არის პირდაპირი ინვესტიცია საქართველოს მომავალში. ეს არის სივრცე, სადაც სრულდება თანამშრომლობა სამ ძირითად მიმართულებას შორის: აკადემია, ანუ სამეცნიერო მიმართულება, ეს არის ეკონომიკა, ქვეყნის სამეწარმეო წრეები და ეს არის მთავრობა, ანუ შესაბამის სამთავრობო უწყებები. ეს მოდელი რომლის გახსნაც ჩვენ დღეს ვნახეთ, არის პირველი მოდელი საქართველოში, სადაც ამ ტიპის თანამშრომლობა, ამ სამ მიმართულებას შორის შედგა. არ შემიძლია დავმალო ჩემი საუკეთესო შთაბეჭდილება, როდესაც ვნახე თუ რამხელა პოტენციალია ჩვენ ახალგაზრდებში ინოვაციური მიმართულებით“, - განაცხადა გიორგი კვირიკაშვილმა.
მისივე თქმით, ეკონომიკის სწრაფი ზრდა შეუძლებელია ინოვაციაზე, კვლევასა და განვითარებაზე დაფუძნებული დარგების განვითარების გარეშე.
„ეს სივრცე იქნება სწორედ ის სივრცე, სადაც მოხდება დაფუძნება და პირველი ეტაპის გავლა იმ კომპანიების მხრიდან, რომლებსაც ამ მიმართულებით განსაკუთრებული პოტენციალი გააჩნია.
ამ სივრცეში უკვე ჩვენ გვყავს წამყვანი კომპანიების წარმომადგენლობები და ასევე, საქპატენტის წარმომადგენლობა, რომელიც საშუალებას იძლევა, რომ დასაწყისშივე დაპატენტდეს მნიშვნელოვანი გამოგონებები“, - აღნიშნა გიორგი კვირიკაშვილმა.
პრემიერის ინფორმაციით, ტექნოლოგიური პარკში წარმოდგენილია წამყვანი საერთაშრისო კომპანიების მიერ დამზადებული ის აუცილებელი დანადგარები, რომლებიც საშუალებას იძლევა, რომ ახალგაზრდა გამომგონებლებმა მოახდინონ საკუთარი გამოგონებების პროტოტიპიზაცია, ანუ საცდელი ეგზემპლარების ამ სივრცეში გამოშვება.
