23 დეკემბერს 18:30 სთ-ზე, თბილისის მუნიციპალიტეტის საკრებულოს შენობაში გაიმართება საქართველოს სომელიეთა ასოციაციის მიერ ორგანიზებული “ქართული ღვინის მე-2 ეროვნული კონკურსი 2015”- ის საზეიმო დაჯილდოება. სომელიეთა ასოციაცია მეორე წელია, ატარებს „ქართული ღვინის ეროვნულ კონკურსს“, სადაც მუშაობს ორი ჟიური: ერთის მხრივ, პროფესიონალი ენოლოგები, დეგუსტატორები, სომელიეები და მეორეს მხრივ - საზოგადოების წარმომადგენლები. გასულ წელს კონკურსს ჰყავდა მედიაჟიური, ხოლო წელს სახალხო ჟიურის წევრები არიან ქართული კულტურის გამოჩენილი მოღვაწეები - ლანა ღოღობერიძე, ნანი ბრეგვაძე, კახი კავსაძე, გივი ბერიკაშვილი, ნანა ჯორჯაძე, თამარ ბართაია, ლევან ლაღიძე, მაკა მახარაძე, ეკა ჩხეიძე, ნოდარ მამისაშვილი, ლევან კოღუაშვილი, რევაზ კიკნაძე, დინი ვირსალაძე, დავით ტურაშვილი და სხვები. კონკურსი ჩატარდა ორ ტურად და მასში მონაწილეობდა 50-ზე მეტი მეღვინის 1000-ზე მეტი ნიმუში. პროფესიონალმა ჟიურიმ 16 კატეგორიაში გამოავლინა საუკეთესო ღვინოები. სწორედ პროფესიონალი და სახალხო ჟიურის გადაწყვეტილებები გახდება ცნობილი 23 დეკემბერს „ღვინის მე-2 ეროვნული კონკურსი 2015“-ის საზეიმო დაჯილდოებაზე. ამავე შეხვედრაზე, ტრადიციულად, სამი ადამიანი დაჯილდოვდება საქართველოს სომელიეთა ასოციაციის მიერ დაარსებული ღვინის ორდენით, საქართველოს მევენახეობა-მეღვინეობის განვითარებაში შეტანილი განსაკუთრებული წვლილისათვის. კონკურსის დაჯილდოების ცერემონია იმართება ღვინის ეროვნული სააგენტოს, ქალაქ თბილისის მერიისა და თბილისის მუნიციპალიტეტის საკრებულოს მხარდაჭერით.
