19 დეკემბრიდან, აჭარის ტურიზმისა და კურორტების დეპარტამენტი თბილისსა და საქართველოს დიდ ქალაქებში მასშტაბურ სარეკლამო კამპანიებს იწყებს. 19 -დან 24 დეკემბრის ჩათვლით დედაქალაქის უბნებში იწყება მსვლელობა ბრენდირებული ავტობუსით, რომელიც გამვლელების ყურადღებას ხმამაღალი საახალწლო/აჭარული მუსიკებით მიიპყრობს. ავტობუსიდან „საქართველოს ხმა 2015“-ის მონაწილე ბათუმელი ალექსანდრე ზედანია მოსახლეობას მოუწოდებს არ გამოტოვონ გრანდიოზული საახალწლო ღონისძიებები ბათუმში. ავტობუსი პერიოდულად გაჩერდება ხალხმრავალ ადგილებში, სადაც პრომოუტერი გოგონები საახალწლო ღონისძიებების ამსახველ სარეკლამო ფლაერებს დაარიგებენ. დღის ბოლოს აქცია დასრულდება სპეციალური შეჯიბრებით, რომელიც წინასწარ შერჩეულ ადგილას გაიმართება. შეჯიბრებისას გამოვლინდება გამარჯვებული, რომელსაც საჩუქრად 31 დეკემბრისა და 1 იანვარის ღამის 2 კაციანი საგზური გადაეცემა ბათუმში. საგზური ბათუმში გამომგზავრებასა და ღამისთევას ითვალისწინებს.

სარეკლამო აქციები ხვალ 15:00 საათზე კოლმეურნეობის მოედნიდან დაიწყება და თბილისის ყველა უბანს მოიცავს. გათამაშება ყოველ დღე 24 დეკემბრის ჩათვლით სხვადასხვა უბანში, ხალხმრავალ ადგილას გაიმართება.

19 დეკემბერი - 19:00 გათამაშება პუშკინის სკვერში.
20 დეკემბერი - 19:00 გათამაშება წერეთლის ბაღში.
21 დეკემბერი - 19:00 გათამაშება 9 აპრილის ბაღში.
22 დეკემბერი - 19:00 - გათამაშება მრგვალ ბაღში.
23 დეკემბერი - 19:00 - გათამაშება ბუკიას ბაღში.
24 დეკემბერი- 19:00 - გათამაშება ჭონქაძის ქუჩაზე, ვილნიუსის სკვერში.

თბილისის პარალელურად სარეკლამო აქციები ზუგდიდში, ქუთაისსა და თელავში გაიმართება. აქციის დროს ქუთაისის ცენტრალურ უბნებში მოეწყობა მსვლელობა, რომლის დროსაც გავრცელდება სარეკლამო ფლაერები აჭარაში საახალწლოდ დაგეგმილი ღონისძიებების შესახებ. აქციები რეგიონებშიც გათამაშებებით დასრულდება. ყველა გათამაშებაზე ერთი ბათუმის საგზური გათამაშდება. რეგიონებში სარეკლამო აქციები 22 დეკემბერს დაიწყება და 25 დეკემბერს დასრულდება.

ზუგდიდი
22 დეკემბერი -19:00 გათამაშება ცენტრალურ ბაღში.

ქუთაისი
23-24 დეკემბერი - 19:00 გათამაშება ცენტრალურ ბაღში (ქუთაისის ბულვარი).
თელავი

25 დეკემბერი - 19:00 გათამაშება ერეკლეს ძეგლის მიმდებარე სკვერში.

გარდა აქციებისა, ახალი წლის ღონისძიებებისა და ზამთარში აჭარაში დასვენების პოპულარიზაციის მიზნით ასევე აქტიური სარეკლამო კამპანიები ხორციელდება, რაც საქართველოს დიდ ქალაქებსა და თბილისში სარეკლამო ბილბორდების, ფოტო-ბანერების განთავსებასა და სარეკლამო ფლაერების გავრცელებას, ასევე საქართველოს რეგიონალურ არხებზე („აჭარის ტელევიზია“ „გურჯაანი“, "ქვემო ქართლი TV“, "თრიალეთი", "მეცხრე ტალღა") სარეკლამო კლიპის გაშვებას გულისხმობს.