პარლამენტში საქართველოს ვიზა-ლიბერალიზაციასთან დაკავშირებით, რეზოლუციის პროექტებს განიხილავენ.
პლენარულ სხდომაზე რეზოლუციის ორი ტექსტი გავა. ერთი „თავისუფალი დემოკრატების“ წევრს, ვიქტორ დოლიძეს აქვს მომზადებული, რომელსაც მხარს უმრავლესობა უჭერს, ხოლო მეორე დოკუმენტი „ნაციონალურ მოძრაობას“ ეკუთვნის.
სხდომა კითხვა-პასუხის რეჟიმში მიმდინარეობს.
რაც შეეხება ტექსტს, განცხადებაში საუბარია, რომ საქართველო-ევროკავშირის ახალი სახელშეკრულებო ურთიერთობები, რომელიც ასოცირების შესახებ შეთანხმებასა და ღრმა და ყოვლისმომცველი თავისუფალი სავაჭრო სივრცის შესახებ ხელშეკრულებას ეფუძნება, უკანასკნელ წლებში, საქართველოს უმნიშვნელოვანესი მონაპოვარია.
დოკუმენტში აღნიშნულია, რომ ევროპისკენ სწრაფვა და ევროპულ და ევრო-ატლანტიკურ სტრუქტურებში ინტეგრაცია ქართველი ხალხის ურყევი ნება და ისტორიული არჩევანია.
ამას გარდა, განცხადებაში ქვეყანაში მიღწეული პროგრესი ხაზგასმულია და საქართველო იტალიასა და ბელგიას ასოცირების ხელშეკრულების დროული რატიფიკაციისკენ მოუწოდებს.
დოკუმენტში საუბარია ოკუპირებულ ტერიტორიებზეც და ნათქვამია, რომ ევროკავშირთან უვიზო რეჟიმის დაწესება ხელს შეუწყობს საქართველოს ოკუპირებულ ტერიტორიებზე, აფხაზეთსა და ცხინვალის რეგიონში, მცხოვრები ხალხის რეინტეგრაციასა და კეთილდღეობას, მეტიც ყველასათვის გამოავლენს ევროკავშირთან პარტნიორობის ნაყოფიერ შედეგებსა და ევროპული არჩევანის უტყუარ სარგებელს.
ამასთანავე, პარლამენტი მოუწოდებს საქართველოს მთავრობას გააგრძელოს მიზნობრივი საინფორმაციო კამპანიების წარმოება და გაავრცელოს უვიზო მოგზაურობის უფლებები და ვალდებულებები.
