თბილისში ევროპის რეკონსტრუქციის და განვითარების ბანკისა და შვედეთის საერთაშორისო განვითარების სააგენტოს ორგანიზებით მდგრადი მუნიციპალური მომსახურების მართვის საკითხებზე რეგიონული სემინარი მიმდინარეობს. სემინარი ვიცე-მერმა ლაშა აბაშიძემ გახსნა და დამსწრე საზოგადოებას მისასალმებელი სიტყვით მიმართა.
ვიცე-მერმა ყურადღება დედაქალაქის მერიის მიერ მუნიციპალური სერვისების მიმართულებით განხორციელებულ სიახლეებზე გაამახვილა. ლაშა აბაშიძის განცხადებით, მსგავსი სახის სემინარები საუკეთესო საშუალებაა საერთაშორისო პრაქტიკის ურთიერთგაზიარებისა და ამ მიმართულებით განხორციელებული სიახლეების შესახებ ინფორმაციის გაცვლისათვის.
„ევროპის რეკონსტრუქციისა და განვითარების ბანკის მიერ ჩატარებული სემინარის მნიშვნელობა ძალიან დიდია. ჩვენ ევრობანკთან განსაკუთრებული თანამშრომლობა გვაკავშირებს, რადგან ისინი, როგორც ფინანსირების საკითხებში, ასევე ბევრი სხვა მიმართულებით გვეხმარებიან. აღსანიშნავია, რომ მომავალ წელს, ევრობანკის ფინანსური მხარდაჭერით, 200 ახალი ავტობუსის შესყიდვა იგეგმება. ასევე, ბანკი გვეხმარება არაერთი მუნიციპალური სერვისის დანერგვასა და იმპლემენტაციაში, რაც დედაქალაქის ეფექტურად განვითარებისთვის ძალიან მნიშვნელოვანია“,- განაცხადა ვიცე-მერმა ლაშა აბაშიძემ.
ორდღიან სემინარს სომხეთის, ბელორუსიის, ყაზახეთის, ყირგიზეთის, მოლდოვის, მონღოლეთის, ტაჯიკეთისა და თურქმენეთის სამინისტროების, კომუნალური კომპანიებისა და ქალაქის ადმინისტრაციების წარმომადგენლები ესწრებიან. საერთაშორისო კონფერენციის მონაწილეები ერთმანეთს მდგრადი მუნიციპალური სერვისების მიმართულებით საუკეთესო პრაქტიკასა და დანერგილ სიახლეებს გაუზიარებენ, მათ შორის ისეთ მუნიციპალურ მომსახურებებზე, როგორებიცაა - წყალი და კანალიზაცია, მყარი ნარჩენები, საზოგადოებრივი ტრანსპორტი, სატრანსპორტო მოძრაობის მართვა და გარე განათების სისტემები.
ევროპის რეკონსტრუქციისა და განვითარების ბანკის წარმომადგენლების გაცხადებით, ევრობანკი კვლავ საქართველოს ერთგულ პარტნიორად რჩება და ის ფაქტი, რომ საერთაშორისო სემინარი თბილისში იმართება, გამოხატავს ბანკის მზადყოფნას, მხარი დაუჭიროს მუნიციპალური ინფრასტრუქტურის გაძლიერებას, როგოც დედაქალაქის, ასევე, მთელი ქვეყნის მასშტაბით.
