მიმდინარე წელს თბილისის მერიამ ყველაზე ძვირად დუშეთის რაიონში, სოფელ კაიშაურებში „მთა ვარცლას“ მიმდებრედ მიწის ნაკვეთები გაასხვისა.
როგორც ქალაქ თბილისის მუნიციპალიტეტის სსიპ ქონების მართვის სააგენტოში განმარტავენ, 2015 წლის პერიოდში ყველაზე ძვირად, 5 მლნ ლარად, პირობებიან აუქციონზე დუშეთის რაიონში, „მთა ვარცლა“-ს მიმდებარედ უძრავი ქონება გასხვისდა. საუბარია ორ მიწის ნაკვეთზე და მასზე განთავსებულ შენობა-ნაგებობებზე.
ქალაქ თბილისის მუნიციპალიტეტის სსიპ ქონების მართვის სააგენტოს ინფორმაციით, 2014 წლის განმავლობაში და 2015 წლის 20 ნოემბრის მდგომარეობით, გაყიდული ობიექტების რაოდენობა შეადგენს 487 ერთეულს და 2015 წლის 20 ნოემბრის მდგომარეობით, პრივატიზაციის გეგმა შესრულდა 89,5 %-ით. ხოლო 2015 წლის 20 ნოემბრამდე პრივატიზებული ქონებიდან დარჩენილი შემოსასვლელი თანხა 4 მლნ 134 ათას 38 ლარს შეადგენს.
