დღეს მწვანე მეწარმეობის განვითარებით დაინტერესებულ სტუდენტებსა და მეწარმეებს ეძლევათ შანსი ბიზნეს სემინარის ფარგლებში მოისმინონ სხვადასხვა მეწარმის წარმატების ისტორიები, მიიღონ ინფორმაცია საქართველოში მეწარმეობის განვითარების პოლიტიკასა და ხელმისაწვდომ მექანიზმებთან დაკავშირებით და გაეცნონ მწვანე მეწარმეობის კონცეფციას, არსებულ გამოწვევებსა და შედეგებს.
აღნიშნული ღონისძიება არის მეწარმეობის განვითარების სააგენტოს სტრატეგიის ნაწილი მოახდინოს საქართველოში სამეწარმეო საქმიანობის წახალისება და შესაბამისი კულტურის დანერგვა. მნიშვნელოვანია პოტენციურ მეწარმეებს ხელი მიუწვდებოდეთ საჭირო ინფორმაციასა და რესურსებზე.
ბიზნეს სემინარი „მწვანე მეწარმეობა, ზრდა და წარმატება“ 2015 წლის 1 დეკემბერს 16:30 საათზე გაიმართება საქართველოში ამერიკის შეერთებული შტატების საელჩოსა და მეწარმეობის განვითარების სააგენტოს ინიციატივით, მეწარმეობის განვითარების სააგენტოს მომსახურების ცენტრში (უზნაძის 18). სემინარი წარიმართება პანელ დისკუსიის ფორმატით და ორიენტირებული იქნება აუდიტორიის მხრიდან მაქსიმალურ ჩართულობაზე.
ღონისძიებას გახსნის საქართველოში ამერიკის შეერთებული შტატების ეკონომიკური და პოლიტიკური საკითხების დეპარტამენტის უფროსის მოადგილე. დამსწრე საზოგადოებას მეწარმეობის განვითარებისათვის ხელმისაწვდომ მექანიზმებს გააცნობს მეწარმეობის განვითარების სააგენტოს მთავარი ანალიტიკოსი რატი ანჯაფარიძე. ტექნოლოგიების განვითარების ფონდის წარმომადგენელი მიმოიხილავს მწვანე მეწარმეობას. ამასთანავე მეწარმეები ზაზა ნანუაშვილი (კომპანია „ბაზალტ ფაიბერი“), მამუკა სხვიტარიძე (კომპანია „ტრანს კავკასუს კრისტალი) და დავით ბარდაველიძე (კომპანია „ჯორჯიან პროდაქტსი“) დამსწრე საზოგადოებას გაუზიარებენ ბიზნესის კეთების გამოცდილებას და ისაუბრებენ მოკლე დროში მიღწეულ წარმატებაზე.
საქართველოს ეკონომიკისა და მდგრადი განვითარების სამინისტროს მეწარმეობის განვითარების სააგენტო აქტიურად თანამშრომლობს საქართველოში ამერიკის შეერთებული შტატების საელჩოსთან რიგ საკითხებზე, მათ შორის სახელმწიფო პროგრამის „აწარმოე საქართველოში“ ფარგლებში ახალი კომპონენტის, კინო ინდუსტრიის განვითარების მხარდაჭერის კუთხით, აგრეთვე სავაჭრო ღონისძიებების ორგანიზების, ამერიკული კომპანიების საქართველოში ვიზიტის დაგეგმვისა და აღნიშნული ორი ქვეყნის კერძო სექტორის წარმომადგენლებს შორის ბიზნეს კავშირების დამყარების მხრივ.
