29 ნოემბერს 12:00 საათზე რიგით მეორე თბილისის ინტერნეტ ფორუმი გაიხსნება რომლის მიზანია ბლოგერების, ონლაინ აქტივისტების და ინტერნეტის განვითარებით დაინტერესებული პირების შეკრება და ადგილობრივი თუ მსოფლიოს ინტერნეტსივრცისა და მოვლენების შესახებ დისკუსიის გამართვა.
თბილისის ინტერნეტ ფორუმი სხვა ქვეყნებში მიმდინარე, მსგავსი ღონისძიებების ანალოგია, რომლებიც ინტერნეტის შესახებ ჩატარებული დისკუსიების მთავარი პლატფორმებია. გამომდინარე იქიდან რომ სამხრეთ კავკასიაში საქართველო როგორც ინტერნეტის სიჩქარით, ასევე მომხმარებლების რაოდენობით ლიდერობს მსგავსი ღონისძიების ჩატარება ინტერნეტის განვითარებისა და ადამიანების ცნობიერების ამაღლებისთვის აუცილებელია.
საქართველოში ინტერნეტის განვითარებისა და ხელმისაწვდომობის ზრდის პარალელურად იზრდება ადამიანთა დაინტერესება ციფრული ტექნოლოგიების მიმართ. თბილისის ინტერნეტ ფორუმი ამ ადამიანებს საშუალებას აძლევს გაიცნონ ერთმანეთი, გაუზირონ ერთმანეთს გამოცდილება, დასახონ მიზნები და სამომავლოდ განახორციელონ საინტერესო პროექტები.
ფორუმი მასპინძლობს საქართველოში ინტერნეტის განვითარებაში ჩართულ ადამიანებს, მეწარმეებს, აქტივისტებსა თუ ბლოგერებს, რომლებიც სხვადასხვა პროექტებსა თუ იდეებზე საუბრობენ. პირველი თბილისის ინტერნეტ ფორუმი 2014 წელს ჩატარდა.
ღონისძიებაში 150-ზე მეტი ადამიანი იღებს მონაწილეობას. ფორუმის ფარგლებში ასევე მოეწყობა საქართველოში ტექნოლოგიური პროგრესის გამოფენა, რომლის ფარგლებშიც სხვადასხვა ადამიანები გამოფენენ ტექნიკას საკუთარი კოლექციიდან.
ფორუმზე სხვადასხვა ბექგრაუნდისა და ინტერესის მქონე ადამიანები თავიანთ ბლოგებზე, პროექტებსა და იდეებზე 10-15 წუთის განმავლობაში ისაუბრებენ, რის შემდეგაც ისინი დამსწრეთა კითხვებს უპასუხებენ.
Internet Forum Tbilisi 2015 გივი ზალდასტანიშვილის ამერიკულ აკადემიაში გაიმართება (ლისის ტბაზე)
2015 წლის თბილისის ინტერნეტ ფორუმი ფონდი ჯუნოსა და კავკასუს ონლაინის თანამშრომლობით ხორციელდება.
