ბოლო დღეებში განვითარებულ სტიქიურ მოვლენებთან დაკავშირებით, საქართველოს რეგიონული განვითარებისა და ინფრასტრუქტურის მინისტრმა ნოდარ ჯავახიშვილმა ბრიფინგი გამართა.
„ნოემბრის თვეში განვითარებულმა სტიქიურმა მოვლენებმა საქართველოს არაერთი რეგიონი დააზარალა. პრობლემები შეექმნა როგორც მოსახლეობის საცხოვრებელ სახლებსა და საკარმიდამო ნაკვეთებს, ასევე, რაც არანაკლებ მნიშვნელოვანია, საქართველოს გზებსა და ხიდებს“, - განაცხადა მინისტრმა.
მისვე თქმით, განსაკუთრებით დაზიანდა თბილისი-სენაკი-ლესელიძის ცენტრალური მაგისტრალის რამდენიმე მონაკვეთი, მათ შორის რიკოთის გვირაბის მიმდებარე საგზაო მონაკვეთი, (კმ 155-ზე სადაც მდ. რიკოთულამ გამორეცხა გზის ქვედა საყრდენი კედელი და ჩავარდა გზის გვერდული), თერჯოლის გადასახვევთან 206-ე კმ-ზე მდებარე მონაკვეთი (სადაც მდ. ჩხარამ ორჯერ დააზიანა დროებითი გზა, რომელიც აღდგენის შემდეგ კვლავ დაიკეტა და ამ ეტაპზე მიმდინარეობს აღდგენითი სამუშაოები). მოძრაობა გადართულია ზესტაფონი-ბაღდათის გზის ქუთაისის მიმართულებაზე.
ჯავახიშვილმა აღნიშნა, რომ სტიქიამ პრობლემები შეუქმნა შიდასახელმწიფოებრივ გზებსაც, მათ შორის: ნოქალაქევი-ბანძა-ხონის, ქუთაისი-ბაღდათის, ძირულა-ხარაგაულის, გომი-საჩხერე-ჭიათურის საგზაო მონაკვეთებზე.
„უხვი ნალექების გამო მეწყრული მოვლენები განვითარდა ბაღდათი-საირმის, წყალტუბო-ცაგერი-ლენტეხის, ქედა-ხულოს, ქუთაისის-ტყიბულის, ხაიში-მესტიის, ვაზიანი-გომბორის საავტომობილო გზების ცალკეულ მონაკვეთებზე. დიდთოვლობისა და ლიპყინულის გამო პრობლემები შეიქმნა მცხეთა-სტეფანწმინდა-ლარსის, ვაზიანი-გომბორი-თელავის, ტყიბული-ამბროლაურის, თბილისი-თიანეთის, ბორჯომი-ბაკურიანის, ცაგერი-ლენტეხი-ლასდილის საავტომობილო გზების ცალკეულ მონაკვეთებზე, სადაც ჩატარდა გზის გაწმენდისა და მარილის დაყრის სამუშაოები“, - განაცხადა მინისტრმა.
ჯავახიშვილმა აღნიშნა, რომ საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის შესაბამისი სამსახურები დასაწყისშივე ჩაერთვნენ სტიქიის შედეგების სალიკვიდაციო სამუშაოებში და უწყვეტ რეჟიმში იღებდნენ შესაბამის ზომებს, როგორც გზის გაწმენდის, ასევე, საავტომობილო გზის აღდგენის და სტიქიის ზონაში ჩარჩენილი ავტომანქანების გამოყვანის თვალსაზრისით.
