უსაფრთხოების საკითხებში ევროკავშირის უმაღლეს წარმომადგენლის,ევროკომისიის ვიცე-პრეზიდენტის ფედერიკა მოგერინის მოსაზრებით, ვიზა-ლიბერალიზაციის მხრივ, საქართველომ მრავალი მნიშვნელოვანი ვალდებულება შეასრულა.
პარლამენტის პრესსამსახურის ინფორმაციით, ქართველ დეპუტატებთან გამართულ შეხვედრაზე მოგერინიმ აღნიშნა, რომ საქართველომ მუშაობა ასეთივე წარმატებით უნდა გააგრძელოს, რათა წლის ბოლოს დადებითი რეკომენდაცია მიიღოს.
მისი თქმით, ის მოხარულია, რომ საქართველოს ევროკავშირთან ურთიერთობა ქართულ პოლიტიკურ პარტიებს აერთიანებს.
„მიუხედავად იმისა, რომ ევროკავშირი მრავალი გამოწვევის წინაშე დგას, აღმოსავლეთ პარტნიორობის ქვეყნებთან ურთიერთობის მნიშვნელობას არსებული პრობლემატური საკითხები ვერ გადაფარავს“, - დასძინა მოგერინიმ.
ამას გარდა, შეხვედრაზე მხარეებმა ასევე განიხილეს რეგიონულ საკითხები და უსაფრთხოების მხრივ არსებული გამოწვევები. საქართველოს პარლამენტის თავმჯდომარემ ევროკავშირის სადამკვირვებლო მისიის (EUMM) მნიშვნელობაზე ისაუბრა და ხაზგასმით აღნიშნა, რომ მიუხედავად იმისა, რომ მისიას სრულად ფუნქციონირების საშუალება არ ეძლევა, ის უსაფრთხოებისთვის მნიშვნელოვან ინსტრუმენტს წარმოადგენს.
