ღვინის ეროვნული სააგენტოს მონაცემებით, 2015 წლის განვლილი 10 თვის განმავლობაში, საქართველოდან მსოფლიოს 42 ქვეყანაში ექსპორტირებულია 28 101 431 ბოთლი (0,75 ლ) ღვინო, რაც თანხობრივად 77,2 მლნ აშშ დოლარს შეადგენს.

ღვინის ეროვნული სააგენტო ხაზს უსვამს ექსპორტის მკვეთრ, 87%-იან მატებას სტრატეგიულად მნიშვნელოვან ჩინეთის ბაზარზე, სადაც საანგარიშო პერიოდში ექსპორტირებულია 1,8 მლნ ბოთლზე მეტი ქართული ღვინო. ჩინეთი ქართული ღვინის ექსპორტიორი ქვეყნების ხუთეულში მეოთხე ადგილს იკავებს რუსეთის, ყაზახეთისა და უკრაინის შემდეგ.

ექსპორტის ზრდა ფიქსირდება ევროკავშირის მთელ რიგ ქვეყნებში: პოლონეთი 2% (1 260 870 ბოთლი), ლატვია - 3% (924 792), ესტონეთი - 35% (389 274), გერმანია - 14% (211 236), ნიდერლანდები - 88% (47 232) და საფრანგეთი - 104% (29 100).

ასევე აღსანიშნავია ექსპორტის ზრდა ისეთ სტრატეგიულად მნიშვნელოვან ბაზრებზე, როგორიცაა აშშ - 26% (209 339), იაპონია - 19% (126 686), კანადა - 66% (147 636), ექსპორტი აგრეთვე გაიზრდა ყირგიზეთში - 168% (172 536), ისრაელში - 212% (33 720), კორეაში - 37% (24 054) და სხვა.